Sarqyt jeuge bolmaidy

 Qazaqstannyŋ bas sanitary Jandarbek Bekşinnıŋ carqyt jeuge bolmaidy degen sözı tüsınbeuşılık tudyrdy. Onyŋ aituynşa, ışek aurularynan saqtanu üşın merekelık dastarqandaǧy tamaqty üige alyp kelmegen jön. Alaida, bas sanitardyŋ būl sözıne qarapaiym halyqtyŋ uäjı bar. Bekşin kün ysyǧynda el ışındegı ışek infeksiiasynyŋ artuyna alaŋdap otyr, dep habarlady KTK.

"Işek arurularynan saqtanu üşın kämpit jäne qūrǧaq konidterlık önımderdı eseptemegende, merekelık dastarqannan alyp keletın sarqytty qoldanbau kerek", - deidı DSM Qoǧamdyq densaulyq saqtau komitetınıŋ töraǧasy Jandarbek Bekşin.

Alaida, bas sanitardyŋ ūsynysy dästürge berık talai jannyŋ narazylyǧyn tudyrdy. Almaty oblysynyŋ tūrǧyny Meiramgül Bekjanovanyŋ aituynşa, qanǧa sıŋgen qasiet sarqyttan bas tartu mümkın emes. Üş balasynan 12 nemere baǧyp-qaǧyp otyrǧan zeinetker sarqyt berekelı tırşılıktıŋ nesıbesı dep esepteidı. "Dastarqanda qalǧan sarqytty alu kerek. Öitkenı, ol dastarqannyŋ basynda ūly, dana adamdar otyr. Sarqytty kelısıp bölıp alyp, üiındegı balalaryna, nemerelerıne senderge jūǧysty bolsyn, alyŋdar, jeŋder dep aparyp beredı. Qazırgı sarqyttyŋ män-maǧynasy sol", - deidı Meiramgül Bekjanova. Al, etnograf Gülım Qabdoldinanyŋ aituynşa, sarqyt ǧūryptyq mänın joǧaltpaǧan ejelgı dästürdıŋ bırı. Bala kezınde qonaqqa ketken ülkenderden sarqyt kütıp öskenın jasyrmaǧan etnograf dästürden bas tartuǧa bolmaitynyn aitady.

"Toidy toihanada jasaidy. Odan köp närse ysyrap bolyp qalady. Sondyqtan üi ışınde balalar auyz tisın dep salyp alǧan öte dūrys. Gigienalyq talaptarǧa sai kelmeidı dep dästürden bas tartuǧa bolmaidy. Bızdıŋ qazaqtyŋ dästürındegı qai yrymyn, qai tyiymyn almaiyn, köregendık jatyr är jaǧynda", - deidı  etnograf Gülım Qabdoldina.

Dästürdıŋ ozyǧy bar, tozyǧy bar desek te, sarqyt alu qazırgı saltymyzdyŋ ajyramas bölıgı ekenı şyndyq. Demek, bas sanitar qanşa jerden ūsynys aitsa da, san ǧasyrlyq ǧūrypty ūstanǧandar ata dästürden bır künde bas tarta qoiuy ekıtalai.