ەلىمىزدە العاش رەت اۋدان جانە وبلىستىق ماڭىزى بار قالالاردىڭ اكىمىن سايلاۋ ءوتىپ جاتىر، دەپ حابارلايدى "ادىرنا" ءتىلشىسى Kazinform-عا سىلتەمە جاساپ.
5 قاراشا كۇنى 42 اۋدان مەن وبلىستىق ماڭىزى بار 3 قالادا سايلاۋ وتۋدە.
مەملەكەت باسشىسى قاسىم-جومارت توقاەۆ بيىلعى جولداۋىندا اۋداندار مەن وبلىستىق ماڭىزى بار قالالاردىڭ اكىمدەرى سايلاناتىنىن مالىمدەگەن بولاتىن.
اۋداندار مەن وبلىستىق ماڭىزى بار قالالاردىڭ اكىمدەرىن تىكەلەي سايلاۋ باستاماسى مەملەكەتتىك باسقارۋدى ورتالىقسىزداندىرۋعا جانە ازاماتتاردىڭ جەرگىلىكتى اتقارۋشى بيلىك دەڭگەيىندە شەشىمدەر قابىلداۋعا تىكەلەي قاتىسۋىن كەڭەيتۋگە باعىتتالعان ساياسي رەفورمالار ۇدەرىسىنىڭ ماڭىزدى كەزەڭىنىڭ ءبىرى بولىپ تابىلادى.
بۇل سايلاۋدى وتكىزۋ ءۇشىن قاجەتتى قۇقىقتىق بازا وتكەن جىلى قالىپتاسقان. وكىلەتتىكتەرگە سايكەس 17 وبلىستىڭ ءماسليحاتتارى قاناتقاقتى رەجىمدە سايلاۋ وتكىزۋ ءۇشىن 45 اۋدان مەن وبلىستىق ماڭىزى بار 3 قالالاردىڭ ءتىزبەسىن بەكىتىپ قويعان بولاتىن.
كانديداتتاردى تىركەۋ سايلاۋ كوميسسياسى بۇكىل قاجەتتى قۇجاتتاردى العاننان كەيىن باستالدى جانە سايلاۋ كۇنىنە 25 كۇن قالعاندا جەرگىلىكتى ۋاقىت بويىنشا ساعات 18.00-دە اياقتالعان.
ال سايلاۋ الدىنداعى ۇگىت-ناسيحات جۇمىستارى ساياسي ناۋقانعا 25 كۇن قالعاندا جانە سايلاۋ كۇنىنە دەيىنگى كۇننىڭ جەرگىلىكتى ۋاقىتى بويىنشا ساعات 00.00-دە توقتاتىلدى.
سايلاۋعا قاتىسۋعا 164 كانديدات نيەت ءبىلدىردى. ولاردىڭ 69-ىن ساياسي پارتيالار، ال 95-ءى ءوزىن-ءوزى ۇسىندى.
تىركەلگەن ۇمىتكەرلەردىڭ اراسىندا ەڭ ۇلكەنى ماڭعىستاۋ وبلىسىنىڭ بەينەۋ اۋدانىندا — 61 جاستا، ەڭ جاس كانديدات تۇركىستان وبلىسىنىڭ ماقتاارال اۋدانىنان ءتۇسىپ وتىر.
اكىمدىككە ۇمىتكەرلەردىڭ كوپشىلىگى — ەر ادامدار. دەگەنمەن كانديداتتار اراسىندا 10 ايەل تىركەلگەن.
اۋداندار مەن وبلىستىق ماڭىزى بار قالالار اكىمىنىڭ سايلاۋىنداعى ورتاشا باسەكە 3-تەن اسادى. ەڭ جوعارى باسەكە جەتىسۋ وبلىسىنىڭ كەربۇلاق اۋدانىندا — ءبىر ورىنعا 6 كانديدات. ال ەڭ تومەنى اقمولا وبلىسىنىڭ شورتاندى اۋدانىندا — ءبىر ورىنعا 2 كانديدات تىركەلگەن.