Elimizde alǵash ret aýdan jáne oblystyq mańyzy bar qalalardyń ákimin saılaý ótip jatyr, dep habarlaıdy "Adyrna" tilshisi Kazinform-ǵa silteme jasap.
5 qarasha kúni 42 aýdan men oblystyq mańyzy bar 3 qalada saılaý ótýde.
Memleket basshysy Qasym-Jomart Toqaev bıylǵy Joldaýynda aýdandar men oblystyq mańyzy bar qalalardyń ákimderi saılanatynyn málimdegen bolatyn.
Aýdandar men oblystyq mańyzy bar qalalardyń ákimderin tikeleı saılaý bastamasy memlekettik basqarýdy ortalyqsyzdandyrýǵa jáne azamattardyń jergilikti atqarýshy bılik deńgeıinde sheshimder qabyldaýǵa tikeleı qatysýyn keńeıtýge baǵyttalǵan saıası reformalar úderisiniń mańyzdy kezeńiniń biri bolyp tabylady.
Bul saılaýdy ótkizý úshin qajetti quqyqtyq baza ótken jyly qalyptasqan. Ókilettikterge sáıkes 17 oblystyń máslıhattary qanatqaqty rejimde saılaý ótkizý úshin 45 aýdan men oblystyq mańyzy bar 3 qalalardyń tizbesin bekitip qoıǵan bolatyn.
Kandıdattardy tirkeý saılaý komıssııasy búkil qajetti qujattardy alǵannan keıin bastaldy jáne saılaý kúnine 25 kún qalǵanda jergilikti ýaqyt boıynsha saǵat 18.00-de aıaqtalǵan.
Al saılaý aldyndaǵy úgit-nasıhat jumystary saıası naýqanǵa 25 kún qalǵanda jáne saılaý kúnine deıingi kúnniń jergilikti ýaqyty boıynsha saǵat 00.00-de toqtatyldy.
Saılaýǵa qatysýǵa 164 kandıdat nıet bildirdi. Olardyń 69-yn saıası partııalar, al 95-i ózin-ózi usyndy.
Tirkelgen úmitkerlerdiń arasynda eń úlkeni Mańǵystaý oblysynyń Beıneý aýdanynda — 61 jasta, eń jas kandıdat Túrkistan oblysynyń Maqtaaral aýdanynan túsip otyr.
Ákimdikke úmitkerlerdiń kópshiligi — er adamdar. Degenmen kandıdattar arasynda 10 áıel tirkelgen.
Aýdandar men oblystyq mańyzy bar qalalar ákiminiń saılaýyndaǵy ortasha báseke 3-ten asady. Eń joǵary báseke Jetisý oblysynyń Kerbulaq aýdanynda — bir orynǵa 6 kandıdat. Al eń tómeni Aqmola oblysynyń Shortandy aýdanynda — bir orynǵa 2 kandıdat tirkelgen.
