اۋىل جاققا باردىم. جولاي وتكەندە اياگوزدە ورتتەن قايتقان ءتورت ءسابيدىڭ ۇيىنە كىرىپ، ورنىنا باتا جاسادىم. جەتىسىن بەرىپ جاتىر ەكەن. بايعۇس اكە-شەشە ەستەرىن جيا الماي، ءالى مەڭ-زەڭ بولىپ وتىر.
رەسمي اقپارات قايتىس بولعان ءتورت بالانىڭ ەكەۋىن "ەگىز" دەپ بەرگەن ەدى. ولاي ەمەس ەكەن. ارنۇر مەن نۇراسىلدىڭ اراسى ەكى جاس. تۋىستارىنىڭ ايتۋىنششا وتباسىنىڭ ەكىنشى ۇلى نۇراسىلدىڭ كوزى دۇرىس كورمەيدى. بۇعان دەيىن ەكى رەت وتا جاساتقان. ءۇشىنشى رەت تاعى ءبىر وتا جاساتۋ ءۇشىن اكەسى تام-تۇمداپ تيىن تەبەن جيناعان. 900 مىڭ تەڭگە. ونى قىسقى كۋرتكاسىنىڭ ءتوس قالتاسىنا ساقتاعان. ءورت بولعان كۇنى سول اقشانى ەرلى-زايىپتىنىڭ نەكە ساقيناسىمەن قوسا ۇرلاپ كەتىپتى. "ۇيگە ءورت سوندىرۋشىلەر مەن پوليتسيادان باسقا ەشكىم كىرگەن جوق" دەيدى باۋىرجاننىڭ جاقىندارى.
ايتپاقشى، ءۇش بالانى اكەسى، كىشكەنتاي ۇلدى كورشىسى الىپ شىققان. ءورت سوندىرۋشىلەر سودان كەيىن عانا كەلگەن. وتاعاسىنىڭ قولىنا الاتىن جالاقىسى 80 مىڭ تەڭگە عانا بولعان. رەسمي بيلىكتىڭ "120 مىڭ تەڭگە" دەگەنى دە وتىرىك. 2019 جىلى ءۇش اي اتاۋلى الەۋمەتتىك كومەك العان. كەيىن ءبىر سيىرىڭ بار ەكەن دەپ قىسقارتقان. ونىمەن قويماي "ەگەر قول قويماساڭ ءۇش ايدىڭ اقشاسىن ءوندىرىپ الامىز" دەپ قورقىتىپ، ء"وز ەركىممەن باس تارتام" دەپ جازدىرىپ العان.
وسىدان ەكى جىل بۇرىن اياگوزدەن شۇبارتاۋعا شىعاتىن تۇسقا الەۋمەتتىك ۇيلەر سالعان ەدى. سودان ءۇي بەرىپتى. "جەلتوقساندا ءۇش كۇننىڭ ىشىندە كىر" دەدى. كىردىك. كۇنىنە ون ەكى شەلەك كومىر جاقتىق. تەرەزەنىڭ استىنان جەل سوعىپ، ءۇي جىلىمادى. بالالار اۋىرا باستادى. ءبىر اپتا وتكەننەن كەيىن "كوكتەمدە ءۇيدى جوندەپ بىراق كىرەيىك. ەسكى بولسا دا بۇرىنعى ۇيىمىزگە قىستايىق" دەدىك. اكىمدىك "بولمايدى. ولاي بولسا ۇيدەن باس تارتامىز دەپ قولحات جازىپ بەر" دەدى. امالسىز جازىپ بەردىك دەيدى قارالى شاڭىراق يەلەرى.
قارالى وتباسى ازىرگە تۋىستارىنىڭ ءۇيىن پانالاپ ءجۇر. اۋدان اكىمى قاراشانىڭ سوڭىنا دەيىن جالدامالى ءۇي تاۋىپ بەرەتىنىن، سوسىن جينالعان قاراجاتقا قالادان ءۇي الىپ بەرۋگە ۋادە ەتكەن.
بالالاردىڭ شەشەسى ەكى سيىردىڭ ءسۇتىن ساتۋعا كەتكەن. سونداعى كۇندىك تابىسى 1500-2000 تەڭگە ەكەن. بالالار سول كەزدە سىرىڭكە جاققان. ماتراسقا ءتيىپ تۇتانعان. ءۇيدىڭ ءىشىن الىپ كەتكەن تۇتىنگە تۇنشىعىپ ولگەن. كىشكەنتاي رامازاننىڭ ەمشەكتەن شىققانىنا ەكى اي عانا بولىپتى.
