Aýyl jaqqa bardym. Jolaı ótkende Aıagózde órtten qaıtqan tórt sábıdiń úıine kirip, ornyna bata jasadym. Jetisin berip jatyr eken. Baıǵus áke-sheshe esterin jııa almaı, áli meń-zeń bolyp otyr.
Resmı aqparat qaıtys bolǵan tórt balanyń ekeýin "egiz" dep bergen edi. Olaı emes eken. Arnur men Nurasyldyń arasy eki jas. Týystarynyń aıtýyna otbasynyń ekinshi uly Nurasyldyń kózi durys kórmeıdi. Buǵan deıin eki ret ota jasatqan. Úshinshi ret taǵy bir ota jasatý úshin ákesi tam-tumdap tıyn teben jınaǵan. 900 myń teńge. Ony qysqy kýrtkasynyń tós qaltasyna saqtaǵan. Órt bolǵan kúni sol aqshany erli-zaıyptynyń neke saqınasymen qosa urlap ketipti. "Úıge órt sóndirýshiler men polıııadan basqa eshkim kirgen joq" deıdi Baýyrjannyń jaqyndary.
Aıtpaqshy, úsh balany ákesi, kishkentaı uldy kórshisi alyp shyqqan. Órt sóndirýshiler sodan keıin ǵana kelgen. Otaǵasynyń qolyna alatyn jalaqysy 80 myń teńge ǵana bolǵan. Resmı bıliktiń "120 myń teńge" degeni de ótirik. 2019 jyly úsh aı ataýly áleýmettik kómek alǵan. Keıin bir sıyryń bar eken dep qysqartqan. Onymen qoımaı "eger qol qoımasań úsh aıdyń aqshasyn óndirip alamyz" dep qorqytyp, "óz erkimmen bas tartam" dep jazdyryp alǵan.
Osydan eki jyl buryn Aıagózden Shubartaýǵa shyǵatyn tusqa áleýmettik úıler salǵan edi. Sodan úı beripti. "Jeltoqsanda úsh kúnniń ishinde kir" dedi. Kirdik. Kúnine on eki shelek kómir jaqtyq. Terezeniń astynan jel soǵyp, úı jylymady. Balalar aýyra bastady. Bir apta ótkennen keıin "kóktemde úıdi jóndep biraq kireıik. Eski bolsa da burynǵy úıimizge qystaıyq" dedik. Ákimdik "Bolmaıdy. Olaı bolsa úıden bas tartamyz dep qolhat jazyp ber" dedi. Amalsyz jazyp berdik deıdi qaraly shańyraq ıeleri.
Qaraly otbasy ázirge týystarynyń úıin panalap júr. Aýdan ákimi qarashanyń sońyna deıin jaldamaly úı taýyp beretinin, sosyn jınalǵan qarajatqa qaladan úı alyp berýge ýáde etken.
Balalardyń sheshesi eki sıyrdyń sútin satýǵa ketken. Sondaǵy kúndik tabysy 1500-2000 teńge eken. Balalar sol kezde sirińke jaqqan. Matrasqa tıip tutanǵan. Úıdiń ishin alyp ketken tútinge tunshyǵyp ólgen. Kishkentaı Ramazannyń emshekten shyqqanyna eki aı ǵana bolypty.
