Memleket basshysy Qasym-Jomart Toqaev Túrki memleketteri uıymynyń 10-shy Sammıtindegi kirispe sózin Túrkııany quttyqtaýdan bastady, dep habarlaıdy «Adyrna» tilshisi Aqordaǵa silteme jasap.
«Túrki halyqtarynyń qasıetti qara shańyraǵy – Qazaqstanǵa qosh keldińizder! Eń aldymen, baýyrym Redjep Taııp Erdoǵan myrzaǵa jáne barsha túrik aǵaıyndarǵa Túrkııanyń 100 jyldyq mereıtoıy qutty bolsyn degim keledi. Anadolynyń ǵasyrlyq shejiresi bıik beleske, zor jetistikke toly. Uly tulǵalarynyń arqasynda búginde Túrkııa búkil álemge yqpaly bar qýatty memleketke aınaldy.
Sondaı-aq qadirli Ilham Geıdaroǵly Álıev myrzany jáne Ázerbaıjan halqyn el irgesin bekemdeýimen quttyqtaımyn! Sizdiń elińiz aýmaqtyq tutastyǵyn qalpyna keltirip, damýdyń jańa tarıhı dáýirine qadam basty. Osy tarıhı qadam Birikken Ulttar Uıymynyń Jarǵysyna jáne Qaýipsizdik keńesiniń qararyna sáıkes júzege asty.
Sonymen qatar, Uıymnyń qazirgi tóraǵasy Ózbekstan Prezıdenti, qurmetti Shavkat Mıromonovıch Mırzııoevke túrki elderiniń yntymaqtastyǵyn nyǵaıtýǵa zor úles qosqany úshin erekshe alǵysymdy aıtamyn»,—dedi prezıdent.
Qasym-Jomart Kemeluly baýyrlastyqqa negizdelgen birlikti saqtaý kerektigin atap ótti.
«Biz babalar ósıetin oryndap, túrki elderiniń yntymaǵyn nyǵaıtyp kelemiz. Endigi maqsat – ózara senimge jáne baýyrlastyqqa negizdelgen birligimizdi saqtap, óskeleń urpaqqa tabystaý.
Túrki álemi jahandyq yqpaly bar eldermen teń dárejede qarym-qatynas jasap otyr. Basqa memleketter bizdiń uıymnyń ustanymdaryna basa mán beretin boldy. Sondyqtan, túrki halyqtarynyń yqpaldastyǵyn arttyra túsý – bárimizge ortaq mindet»,—dedi ol.
Aıta keteıik, Túrki memleketteri uıymy sammıti Astanada ótip jatyr.
