سەناتتا كونتسەرتتەر وتكىزۋ تارتىبىنە قاتىستى جاڭا وزگەرىستەر تالقىلاندى، دەپ حابارلايدى "ادىرنا" ۇلتتىق پورتالى.
ۇسىنىلعان تۇزەتۋلەرگە سايكەس، ەندى 200-دەن استام كورەرمەنى بار كونتسەرتتەردە فونوگرامما قولدانۋعا تىيىم سالىنۋى مۇمكىن.
جاڭا تالاپ بويىنشا، ۇيىمداستىرۋشى نەمەسە ءارتىس بۇل تىيىمدى بۇزعان جاعدايدا 1000 ايلىق ەسەپتىك كورسەتكىشكە (اەك) دەيىن، ياعني شامامەن 3 ميلليون 932 مىڭ تەڭگە ايىپپۇل تولەيدى. بۇل نورما «مادەنيەت تۋرالى» زاڭعا ەنگىزىلەتىن جاڭا تولىقتىرۋلاردىڭ ءبىرى بولماق.
تالقىلاۋ بارىسىندا سەناتور سوۆەتبەك مەدەباەۆ زاڭ جوباسىنداعى كەيبىر قايشىلىقتارعا نازار اۋداردى.
«قولدانىستاعى زاڭدا كورەرمەندى فونوگرامما قولداناتىنى تۋرالى الدىن الا حابارلاۋ مىندەتى عانا بار. ال جاڭا تۇزەتۋ تىكەلەي تىيىم سالۋدى كوزدەيدى. بۇل ەكى نورما اراسىندا قايشىلىق بولماي ما؟» – دەدى سەناتور.
مادەنيەت جانە سپورت ۆيتسە-ءمينيسترى ايبەك سىدىقوۆ جاڭا تالاپتىڭ ۇكىمەت دەڭگەيىندە جان-جاقتى قارالعانىن اتاپ ءوتتى.
«فونوگرامما قولدانۋعا بايلانىستى جاۋاپكەرشىلىك ەنگىزۋ نورماسى اكىمشىلىك كودەكسكە ەنگىزىلدى. ەندى فونوگراممانى پايدالانعاندارعا 1000 اەك-كە دەيىن ايىپپۇل سالىنادى. بۇل تالاپتىڭ ورىندالۋىن جەرگىلىكتى اتقارۋشى ورگاندار باقىلايدى»، – دەدى ول.
سەنات توراعاسى ماۋلەن اشىمباەۆ زاڭ جوباسىندا ءالى دە ناقتىلانۋى ءتيىس تۇستار بار ەكەنىن ايتتى.
«شىنىندا دا، كەيبىر نورمالار اراسىندا قايشىلىقتار بار ەكەنىن ءبىزدىڭ زاڭگەرلەر دە اتاپ وتىر. سوندىقتان بۇل ماسەلەنى ناقتىلاۋ قاجەت»، – دەدى ول.
ۆيتسە-مينيستر ايبەك سىدىقوۆ تولىق تىيىم بارلىق مادەني ءىس-شارالارعا ەمەس، تەك كوپشىلىك قاتىساتىن كونتسەرتتەرگە قاتىستى بولاتىنىن ءتۇسىندىردى.
«فونوگرامما تەك كونتسەرتتەردە عانا ەمەس، تەاتر مەن تسيرك سياقتى مادەني مەكەمەلەردە دە قولدانىلادى. سوندىقتان جاڭا تالاپ تەك كونتسەرتتىك، كوپشىلىك قاتىساتىن شارالارعا قاتىستى بولادى»، – دەدى سىدىقوۆ.
ەگەر تۇزەتۋ كۇشىنە ەنسە، قازاقستاندا 200-دەن استام كورەرمەنى بار كونتسەرتتەردە فونوگرامما قولدانۋعا تولىق تىيىم سالىنادى.
