قازاقستان پرەزيدەنتى ازياداعى ءوزارا ءىس-قيمىل جانە سەنىم شارالارى كەڭەسىنىڭ (اوسشك) شتاب-پاتەرىنىڭ اشىلۋ راسىمىندە ازەربايجان مەملەكەتىنە العىس ايتتى، دەپ حابارلايدى "ادىرنا" ۇلتتىق پورتالى.
پرەزيدەنت ەلىمىزدە ديپلوماتيا سالاسىنىڭ قىزمەتكەرلەرى مەن ارداگەرلەرىن كاسىبي مەرەكەلەرىمەن قۇتتىقتاپ، قازاق حالقىنىڭ عاسىرلار بويى قالىپتاسقان «دالا ديپلوماتياسى» بەيبىتشىلىكتى ساقتاۋدىڭ ەرەكشە ۇلگىسى بولعانىن اتاپ ءوتتى.
«بابالارىمىزدىڭ مامىلەگەرلىك ءداستۇرىنىڭ ارقاسىندا ۇلى دالامىزدا بەيبىت ءومىر سالتانات قۇردى. قۇرمەت پەن سىيلاستىق – قاستەرلى قۇندىلىعىمىز. بۇل قاعيدالار — قازاقستاننىڭ سىرتقى ساياساتىنداعى باستى ۇستانىم»، – دەدى مەملەكەت باسشىسى.
توقاەۆ اوسشك شتاب-پاتەرىنىڭ استانادا اشىلۋىن تاريحي وقيعا دەپ باعالاپ، بۇل ۇيىمنىڭ 30 جىلدان بەرى ازيا ەلدەرى اراسىنداعى سەنىم مەن ىنتىماقتاستىقتى نىعايتۋعا ىقپال ەتىپ كەلە جاتقانىن ايتتى.
«ازيانىڭ 90 پايىزىن جانە الەم حالقىنىڭ جارتىسىنان استامىن قامتيتىن اوسشك – قازىرگى حالىقارالىق قاتىناستاردىڭ ماڭىزدى بولىگىنە اينالدى. ءبىز ءاردايىم بەيبىتشىلىك پەن تۇراقتىلىق تەك ديالوگ جانە ءوزارا تۇسىنىستىك ارقىلى ورنايدى دەپ سەندىك»، – دەدى توقاەۆ.
پرەزيدەنت گەوساياسي جاعدايدىڭ ۋشىعۋى مەن حالىقارالىق قۇقىقتىڭ ەرەجەلەرىنىڭ بۇزىلۋى جاھاندىق تۇراقتىلىققا ۇلكەن قاۋىپ ءتوندىرىپ وتىرعانىنا توقتالدى. ول حالىقارالىق قۇقىق پەن بۇۇ جارعىسىن قاتاڭ ساقتاۋ قاجەتتىگىن ەرەكشە اتاپ ءوتتى.
ءسوز سوڭىندا قاسىم-جومارت توقاەۆ بارلىق اوسشك قاتىسۋشىلارىنا تابىس تىلەپ، ۇيىمنىڭ دامۋىنا ەلەۋلى ۇلەس قوسقان ازەربايجان مەملەكەتىنە ەرەكشە ريزاشىلىعىن ءبىلدىردى.
«قازاقستاننىڭ سەنىمدى دوسى – ازەربايجان ەلىنە ۇيىمعا جوعارى دەڭگەيدە توراعالىق ەتكەنى جانە اوسشك-ءنىڭ دامۋىنا قوسقان ۇلەسى ءۇشىن العىس ايتامىن»، – دەدى مەملەكەت باسشىسى
