تالدىقورعاندا جەدەل جاردەم جۇرگىزۋشىسى جول جيەگىندە كولىك دوڭگەلەگىن اۋىستىرىپ جاتقان ەر ادامدى باسىپ كەتتى. بۇل تۋرالى ىشكى ىستەر مينيسترلىگى مالىمدەدى، دەپ حابارلايدى “ادىرنا” ۇلتتىق پورتالى.
وقيعا 30 قازانعا قاراعان ءتۇنى بولعان.
54 جاستاعى جەدەل جاردەم كولىگىنىڭ جۇرگىزۋشىسى بالپىق بي كوشەسىمەن كەلە جاتىپ، جول جيەگىندە تۇرعان Audi كولىگىمەن سوقتىعىسادى. سوققى كەزىندە جەڭىل كولىكتىڭ 37 جاستاعى جۇرگىزۋشىسى جولاۋشىسىمەن بىرگە كولىكتىڭ ارتقى دوڭگەلەگىن اۋىستىرىپ جاتقان. جەڭىل كولىك جۇرگىزۋشىسى سول جەردە قايتىس بولدى. سونداي-اق 36 جاستاعى ەر ادام ءتۇرلى دەنە جاراقاتتارىمەن اۋرۋحانانىڭ رەانيماتسيا بولىمىنە جاتقىزىلدى، - دەلىنگەن حابارلامادا.
سونداي-اق، فاكتىگە قاتىستى قاجەتتى ساراپتامالار تاعايىندالىپ، قك-ءنىڭ 345-بابىنىڭ 3-ءبولىمى بويىنشا تەرگەۋ باستالدى. قىلمىستىق ءىستى تەرگەۋدى وبلىستىق پوليتسيا دەپارتامەنتى باقىلاۋعا الدى.
