توتەنشە جاعدايلار ءمينيسترى گەنەرال-مايور سىرىم ءشارىپحانوۆ شاحتاعا ءتۇسۋ جۇمىستارىن جۇرگىزدى، دەپ حابارلايدى "ادىرنا" ءتىلشىسى.
قر توتەنشە جاعدايلار ءمينيسترى ءورت جانە كەنشىلەردىڭ قازا بولعان جەرلەردە تەكسەرۋ جۇرگىزدى. بۇل تۋرالى قر تجم ءباسپاسوز قىزمەتى مالىمدەدى.
اۆاريانى جويۋ جونىندەگى جەدەل شتاب تاۋلىك بويى ىزدەستىرۋ-قۇتقارۋ جۇمىستارىن جۇرىگىزىپ جاتىر. ەڭ قاۋىپسىز جانە كەنشىلەر بولۋى مۇمكىن ىقتيمال ۋچاسكەلەر بويىنشا تاۋ-كەن قۇتقارۋشىلارىنىڭ ءوتۋ جولدارى دا تەكسەرىلۋدە. قازىر ىزدەستىرۋ جۇمىستارى شامامەن ءبىر-بىرىنەن 4 كم قاشىقتىقتا ورنالاسقان ەكى ءوندىرۋ ۋچاسكەسىنىڭ اۋدانىندا ءجۇرىپ جاتقانى ايتىلدى.
"تاۋ-كەن قۇتقارۋشىلارى قاجەتتى جابدىقتارمەن جانە بايلانىس قۇرالدارىمەن قامتاماسىز ەتىلگەن. گاز جاعدايىن باقىلاۋ جالعاسۋدا. ىزدەستىرۋ-قۇتقارۋ جۇمىستارىنا بارلىعى «كاسىبي اسكەريلەندىرىلگەن اۆاريالىق-قۇتقارۋ قىزمەتتەرىنىڭ رەسپۋبليكالىق ورتالىق شتابى» جشس قاراعاندى فيليالىنىڭ 55 تاۋ-كەن قۇتقارۋشىسى جانە 15 تەحنيكاسى جۇمىلدىرىلدى",-دەپ جازادى تجم ءباسپاسوز قىزمەتى.
ال كەنشىلەرگە شۇعىل مەديتسينالىق كومەكتى قامتاماسىز ەتۋ ءۇشىن 21 ادام جانە 7 بىرلىك جەدەل مەديتسينالىق جاردەم تەحنيكاسى جۇمىلدىرىلعانى ايتىلدى.
