قاراعاندى وبلىسىندا كوستەنكو اتىنداعى شاحتادا جارىلىس بولىپ، 11 ادام قازا تاپتى. بىراق قايتىس بولعاندار سانى وسە باستادى، دەپ حابارلايدى «ادىرنا» ۇلتتىق پورتالى
«ارسەلورميتتال تەمىرتاۋ» اق ءباسپاسوز قىزمەتىنىڭىڭ مالىمەتىنشە، شاحتادا مەتان جارىلۋى مۇمكىن.
«كوستەنكو اتىنداعى شاحتادا اپات بولعان كەزدە 252 ادام بولدى، 205 كەنشى جەر بەتىنە شىعارىلدى. 7 كەنشىنىڭ ءمايىتى تابىلدى. اپات ورنىندا PVASS قۇتقارۋشىلارى جۇمىسىن جالعاستىرۋدا. شتاب قۇرىلدى. كەنىشتە قاراعاندى وبلىسىنىڭ اكىمى، «ارسەلورميتتال تەمىرتاۋ» اق باس ديرەكتورى، قازاقستان رەسپۋبليكاسى باس پروكۋرورىنىڭ ءبىرىنشى ورىنباسارى، قاراعاندى وبلىسىنىڭ پروكۋرورى، ارنايى قۇقىق قورعاۋ ورگاندارى بار»، – دەلىنگەن كومپانيا حابارلاماسىندا.
كوپ ۇزاماي وبلىس اكىمى ەرماعانبەت بولەكپاەۆ قۇرباندار سانى 11 بولعانىن حابارلادى.
«ءتۇرلى دەنە جاراقاتتارىمەن اۋرۋحاناعا 18 ادام جەتكىزىلدى. 09:00-دەگى اقپارات بويىنشا. كەنشىلەردىڭ جاقىندارى مەن تۋىستارىنا قايعىرا كوڭىل ايتامىن»، – دەپ جازدى ايماق باسشىسى.
قازىر وقيعا ورنىندا 40 قۇتقارۋشى، 10 بىرلىك تەحنيكا مەن 3 پسيحولوگ جۇمىس ىستەپ جاتىر.
ايتا كەتەيىك، «ارسەلورميتتال تەمىرتاۋ» اق-عا قاراستى كوستەنكو شاحتاسىندا بولعان وقيعاعا بايلانىستى توتەنشە جاعدايلار مينيسترلىگى مەن قاراعاندى وبلىسى توتەنشە جاعدايلار دەپارتامەنتى اقپاراتتىق-پسيحولوگيالىق قولداۋ كورسەتۋ ءۇشىن سەنىم تەلەفوندارى ىسكە قوسىلدى: (8-7172) 70-41-08, (8-7212) 51- 72-23.
اقوردانىڭ حابارلاۋىنشا, پرەزيدەنت قاسىم-جومارت توقاەۆ اپاتتان قازا بولعان كەنشىلەردىڭ جاقىندارىنا كوڭىل ايتقان. اقوردانىڭ جازۋىنشا، توقاەۆ ۇكىمەتكە "ارسەلورميتتال تەمىرتاۋمەن" ينۆەستيتسيالىق ارىپتەستىكتى توقتاتۋدى تاپسىرعان. ول وقيعانىڭ ءمان-جايىن انىقتاۋ ءۇشىن ۇكىمەت كوميسسياسى قۇرىلعان بولاتىن.
اپاتقا بايلانىستى "تاۋ نەمەسە قۇرىلىس جۇمىستارىن جۇرگىزۋ كەزىندە قاۋىپسىزدىك ەرەجەلەرىن بۇزۋ" بابى (277-باپ، 3-بولىك) بويىنشا سوتقا دەيىنگى تەرگەۋ امالدارى باستالعان.
كوستەنكو اتىنداعى شاحتا، قاراعاندى كومىر باسسەينىندەگى وزگە شاحتالار ءتارىزدى، "ارسەلورميتتال تەمىرتاۋ" كومپانياسىنا تيەسىلى. كومپانيا سونىمەن بىرگە تەمىرتاۋداعى مەتاللۋرگيا كومبيناتى مەن قالاداعى ينفراقۇرىلىم نىساندارىنا يەلىك ەتەدى. "ارسەلورميتتال تەمىرتاۋ" ارعى تەگى ءۇندى بريتاندىق ميللياردەر لاكشمي ميتتالعا قارايدى.
قازىرگى اقپارات بويىنشا، قازا تاپقاندار سانى 21-گە جەتتى، تاعى 23 كەنشىنى ىزدەۋ جالعاسۋدا. 252 كەنشىنىڭ 208-ءى جەر بەتىنە شىعارىلىپ، ونىڭ 18-ءى مەديتسينالىق كومەككە جۇگىنگەن.
سوڭعى دەرەكتەر بويىنشا كوستەنكو اتىنداعى شاحتادا ساعات 16:00 جاعداي بويىنشا 32 ادامنىڭ دەنەسى تابىلدى، 14 كەنشىنى ىزدەۋ جالعاسۋدا.
ەسكە سالايىق، 17 تامىزدا «ارسەلورميتتال تەمىرتاۋ» كومىر دەپارتامەنتىنە قاراستى «قازاقستان» شاحتاسىندا كونۆەيەر لەنتاسى ورتەنىپ، سالدارىنان بەس كەنشى قازا تاپقان بولاتىن.
«ادىرنا» ۇلتتىق پورتالى
