Qaraǵandy oblysynda Kostenko atyndaǵy shahtada jarylys bolyp, 11 adam qaza tapty. Biraq qaıtys bolǵandar sany óse bastady, dep habarlaıdy «Adyrna» ulttyq portaly
«ArselorMıttal Temirtaý» AQ baspasóz qyzmetinińiń málimetinshe, shahtada metan jarylýy múmkin.
«Kostenko atyndaǵy shahtada apat bolǵan kezde 252 adam boldy, 205 kenshi jer betine shyǵaryldy. 7 kenshiniń máıiti tabyldy. Apat ornynda PVASS qutqarýshylary jumysyn jalǵastyrýda. Shtab quryldy. Kenishte Qaraǵandy oblysynyń ákimi, «ArselorMıttal Temirtaý» AQ bas dırektory, Qazaqstan Respýblıkasy Bas prokýrorynyń birinshi orynbasary, Qaraǵandy oblysynyń prokýrory, arnaıy quqyq qorǵaý organdary bar», – delingen kompanııa habarlamasynda.
Kóp uzamaı oblys ákimi Ermaǵanbet Bólekpaev qurbandar sany 11 bolǵanyn habarlady.
«Túrli dene jaraqattarymen aýrýhanaǵa 18 adam jetkizildi. 09:00-degi aqparat boıynsha. Kenshilerdiń jaqyndary men týystaryna qaıǵyra kóńil aıtamyn», – dep jazdy aımaq basshysy.
Qazir oqıǵa ornynda 40 qutqarýshy, 10 birlik tehnıka men 3 psıholog jumys istep jatyr.
Aıta keteıik, «ArselorMıttal Temirtaý» AQ-ǵa qarasty Kostenko shahtasynda bolǵan oqıǵaǵa baılanysty Tótenshe jaǵdaılar mınıstrligi men Qaraǵandy oblysy tótenshe jaǵdaılar departamenti aqparattyq-psıhologııalyq qoldaý kórsetý úshin senim telefondary iske qosyldy: (8-7172) 70-41-08, (8-7212) 51- 72-23.
Aqordanyń habarlaýynsha, prezıdent Qasym-Jomart Toqaev apattan qaza bolǵan kenshilerdiń jaqyndaryna kóńil aıtqan. Aqordanyń jazýynsha, Toqaev úkimetke "ArselorMıttal Temirtaýmen" ınvestıııalyq áriptestikti toqtatýdy tapsyrǵan. Ol oqıǵanyń mán-jaıyn anyqtaý úshin úkimet komıssııasy qurylǵan bolatyn.
Apatqa baılanysty "Taý nemese qurylys jumystaryn júrgizý kezinde qaýipsizdik erejelerin buzý" baby (277-bap, 3-bólik) boıynsha sotqa deıingi tergeý amaldary bastalǵan.
Kostenko atyndaǵy shahta, Qaraǵandy kómir basseınindegi ózge shahtalar tárizdi, "ArselorMıttal Temirtaý" kompanııasyna tıesili. Kompanııa sonymen birge Temirtaýdaǵy metallýrgııa kombınaty men qaladaǵy ınfraqurylym nysandaryna ıelik etedi. "ArselorMıttal Temirtaý" arǵy tegi úndi brıtandyq mıllıarder Lakshmı Mıttalǵa qaraıdy.
Qazirgi aqparat boıynsha, qaza tapqandar sany 21-ge jetti, taǵy 23 kenshini izdeý jalǵasýda. 252 kenshiniń 208-i jer betine shyǵarylyp, onyń 18-i medıınalyq kómekke júgingen.
Sońǵy derekter boıynsha Kostenko atyndaǵy shahtada saǵat 16:00 jaǵdaı boıynsha 32 adamnyń denesi tabyldy, 14 kenshini izdeý jalǵasýda.
Eske salaıyq, 17 tamyzda «ArselorMıttal Temirtaý» kómir departamentine qarasty «Qazaqstan» shahtasynda konveıer lentasy órtenip, saldarynan bes kenshi qaza tapqan bolatyn.
«Adyrna» ulttyq portaly
