الماتى-قورعاس تاس جولىنىڭ جىگىندەگى پەنوپلاستتى الىپ تاستاعانى ءۇشىن جۋرناليست ايىپپۇل ارقالادى. بۇل تۋرالى دياس نۇراقىن Facebook پاراقشاسىندا جاريالادى، دەپ حابارلايدى “ادىرنا” ۇلتتىق پورتالى.
“جولداردى، تەمiرجول وتپەلەرiن جانە باسقا دا قۇرىلىستاردى نەمەسە جول ءجۇرىسىن رەتتەيتiن تەحنيكالىق قۇرالداردى ءبۇلدiرۋ” دەگەن باپ بويىنشا 6900 تەڭگە ايىپپۇل سالدى. بىراق حاتتاماعا "كەلىسپەيمىن" دەپ جازىپ، قول قويىپ بەردىم.
ويتكەنى بىرجاپىراق پەنوپلاست جول جابىندىسىنا دا تەحنيكالىق قۇرالعا دا جاتپايدى. دەسە دە پوليتسەيلەر داۋلى ۆيدەونى كورە تۇرا، مەنىڭ ەمەس مەحمەتتىڭ جازعان ارىزىنا سۇيەنىپ، حاتتاما تولتىردى.
مويىن جۋان. بۇل ايىپپۇلدى قازىر-اق تولەي سالۋعا بولار ەدى. بىراق 120 ملرد تەڭگە جۇمسالعان بەتون جولدىڭ بىلىعىن اشقانىم ءۇشىن مەنى "جازالاپ جاتقاندارىن" تۇسىنە المادىم”، دەپ جازدى ول.
سونداي-اق، جۋرناليست جول سسلۋ تەحنولوگياسىندا پەنوپلاست بولماۋى كەرەگىن ايتتى.
“سۋپەر-پۋپەر تەحنولوگيامەن سالىنعان بەتونكادا پەنوپلاست دەگەن اتىمەن بولماۋى كەرەك. مۇنى 30-40 جىل جول سالاسىندا جۇمىس ىستەگەن ارداگەرلەر مەن ساراپشىلاردان سۇراپ ءبىلدىم. ءبارى ءبىراۋىزدان دەفورماتسيالىق شوۆتىڭ ورتاسىنا پەنوپلاست سالۋعا بولمايتىنىن ايتتى. سەبەبى بەتون پليتا ارى-بەرى جىلجىعاندا ونى رەتتەپ تۇراتىن رەزينا (جگۋت) بولۋى ءتيىس ەكەن. ال پەنوپلاست بەتون قىسىلعاندا جانشىلىپ، ۇگىتىلىپ كەتەدى دەيدى. بىراق بۇنى اشىپ ايتۋعا اقساقالدارىمىزدىڭ ءبارى قورقادى ەكەن.
ويتكەنى "قازاۆتوجولدان" مەرەكە سايىن ماراپات، ازىن-اۋلاق سىي-سياپات، كەيبىرى ساراپشى رەتىندە ناپاقا تاۋىپ وتىرعاسىن اشىق ايتۋعا جۇرەكسىنەدى. ءبىر سوزبەن ايتقاندا "قازاۆتوجول" ء"بارىن بايلاپ", "مۇرتتارىن مايلاپ" جول سالاسىن بيلەپ-توستەپ العان
مۇنداي مونوپوليستپەن تەك قاراپايىم حالىق قانا كۇرەسۋگە قاۋقارلى. سوندىقتان ءوز اۋىلىڭىزدا، اۋداندا، قالادا، تراسسادا ويىلعان، شۇرىق-تەسىك، "گارموشكا" بولىپ كەتكەن ساپاسىز جول كورسەڭىز، سۋرەتكە ءتۇسىرىپ، او "نك "قازاۆتوجول" جانە قر ونەركاسىپ جانە قۇرىلىس مينيسترلىگى دەگەن پاراقشالاردى بەلگىلەپ، "#بىزگەجاقسىجولكەرەك" دەگەن حەشتەگپەن پوست سالايىق. حالىقتىڭ سالىعى ماقساتتى جۇمسالۋى ءتيىس. ونى تالاپ ەتۋگە تولىق قۇقىمىز بار”، دەدى جۋرناليست.
ايتا كەتەيىك، جۋرناليست دياس نۇراقىن 19 قازان كۇنى الماتى – قورعاس باعىتىنداعى كۇرەجولدىڭ ساپاسىز سالىنعانىن كورسەتىپ، الەۋمەتتىك جەلىگە ۆيدەو جاريالاعان. بەينەجازبادا جوعارى ساناتتى جول سانالاتىن اۆتوبەتوننىڭ قۋىسىن كومپانيا پەنوپلاستپەن جاماپ قويعانى ايتىلادى. بۇل كوپتىڭ اشۋىن تۋعىزىپ، ءتىپتى تالقىعا تۇسكەن ەدى. كەيىن جاۋاپتى كومپانيانىڭ باسشىسى جۋرناليستكە ونلاين تۇرىندە قوقان-لوققى ءۇيىردى.
