Almaty-Qorǧas tas jolynyŋ jıgındegı penoplastty alyp tastaǧany üşın jurnalist aiyppūl arqalady. Būl turaly Dias Nūraqyn Facebook paraqşasynda jariialady, dep habarlaidy “Adyrna” ūlttyq portaly.
“Joldardy, temirjol ötpelerin jäne basqa da qūrylystardy nemese jol jürısın retteitin tehnikalyq qūraldardy büldiru” degen bap boiynşa 6900 teŋge aiyppūl saldy. Bıraq hattamaǧa "kelıspeimın" dep jazyp, qol qoiyp berdım.
Öitkenı bırjapyraq penoplast jol jabyndysyna da tehnikalyq qūralǧa da jatpaidy. Dese de poliseiler dauly videony köre tūra, menıŋ emes Mehmettıŋ jazǧan aryzyna süienıp, hattama toltyrdy.
Moiyn juan. Būl aiyppūldy qazır-aq tölei saluǧa bolar edı. Bıraq 120 mlrd teŋge jūmsalǧan beton joldyŋ bylyǧyn aşqanym üşın menı "jazalap jatqandaryn" tüsıne almadym”, dep jazdy ol.
Sondai-aq, jurnalist jol sslu tehnologiiasynda penoplast bolmauy keregın aitty.
“Super-puper tehnologiiamen salynǧan betonkada penoplast degen atymen bolmauy kerek. Mūny 30-40 jyl jol salasynda jūmys ıstegen ardagerler men sarapşylardan sūrap bıldım. Bärı bırauyzdan deformasiialyq şovtyŋ ortasyna penoplast saluǧa bolmaitynyn aitty. Sebebı beton plita ary-berı jyljyǧanda ony rettep tūratyn rezina (jgut) boluy tiıs eken. Al penoplast beton qysylǧanda janşylyp, ügıtılıp ketedı deidı. Bıraq būny aşyp aituǧa aqsaqaldarymyzdyŋ bärı qorqady eken.
Öitkenı "QazAvtoJoldan" mereke saiyn marapat, azyn-aulaq syi-siiapat, keibırı sarapşy retınde näpaqa tauyp otyrǧasyn aşyq aituǧa jüreksınedı. Bır sözben aitqanda "QazAvtoJol" "bärın bailap", "mūrttaryn mailap" jol salasyn bilep-töstep alǧan
Mūndai monopolistpen tek qarapaiym halyq qana küresuge qauqarly. Sondyqtan öz auylyŋyzda, audanda, qalada, trassada oiylǧan, şūryq-tesık, "garmoşka" bolyp ketken sapasyz jol körseŋız, suretke tüsırıp, AO "NK "QazAvtoJol" jäne QR Önerkäsıp jäne qūrylys ministrlıgı degen paraqşalardy belgılep, "#BızgeJaqsyJolKerek" degen heştegpen post salaiyq. Halyqtyŋ salyǧy maqsatty jūmsaluy tiıs. Ony talap etuge tolyq qūqymyz bar”, dedı jurnalist.
Aita keteiık, Jurnalist Dias Nūraqyn 19 qazan künı Almaty – Qorǧas baǧytyndaǧy kürejoldyŋ sapasyz salynǧanyn körsetıp, äleumettık jelıge video jariialaǧan. Beinejazbada joǧary sanatty jol sanalatyn avtobetonnyŋ quysyn kompaniia penoplastpen jamap qoiǧany aitylady. Būl köptıŋ aşuyn tuǧyzyp, tıptı talqyǧa tüsken edı. Keiın jauapty kompaniianyŋ basşysy jurnalistke onlain türınde qoqan-loqqy üiırdı.
