رەسپۋبليكا كۇنى قارساڭىندا پرەزيدەنت جارلىعىمەن ءبىر توپ ازامات مەملەكەتتىك ناگرادالارمەن ماراپاتتالدى. بۇل تۋرالى اقوردا مالىمدەدى، دەپ حابارلايدى “ادىرنا” ۇلتتىق پورتالى.
ۇلتتىق مەرەكە – رەسپۋبليكا كۇنى قارساڭىندا پرەزيدەنت قاسىم-جومارت توقاەۆتىڭ جارلىعىمەن ەلىمىزدىڭ الەۋمەتتىك-ەكونوميكالىق، مادەني-رۋحاني دامۋىنا، حالىقتار اراسىنداعى دوستىق پەن ىنتىماقتاستىقتى نىعايتۋعا قوسقان ەلەۋلى ۇلەسى مەن بەلسەندى قوعامدىق قىزمەتى ءۇشىن ءبىر توپ ازامات مەملەكەتتىك ناگرادالارمەن ماراپاتتالدى. ولاردىڭ قاتارىندا ءوندىرىس، بيزنەس، ءبىلىم بەرۋ، دەنساۋلىق ساقتاۋ سالالارىنىڭ كورنەكتى وكىلدەرى، اسكەري قىزمەتشىلەر، قۇقىق قورعاۋ ورگاندارىنىڭ قىزمەتكەرلەرى، سپورتشىلار، ەڭبەك ارداگەرلەرى، مادەنيەت جانە عىلىم قايراتكەرلەرى بار.
"قازاقستاننىڭ ەڭبەك ەرى" اتاعى قازاقستان رەسپۋبليكاسىنىڭ مۇناي-گاز سالاسىن دامىتۋداعى ايرىقشا جەتىستىكتەرى، سونداي-اق قوعامدىق-ساياسي قىزمەتتەگى اسا ۇزدىك ەڭبەگى ءۇشىن مەملەكەت جانە قوعام قايراتكەرى، پارلامەنت ءماجىلىسىنىڭ دەپۋتاتى ب.ىزمۇحامبەتوۆكە، ەلىمىزدىڭ الەۋمەتتىك-گۋمانيتارلىق دامۋىنداعى اسا ۇزدىك جەتىستىكتەرى ءۇشىن سەمەي قالاسى "№ 7 جالپى ءبىلىم بەرەتىن ورتا مەكتەپ-ليتسەيىنىڭ مۇعالىمى ا.شۇكەجانوۆاعا جانە وندىرىستىك قىزمەتتەگى ەرەكشە ەڭبەگى ءۇشىن قىزىلوردا وبلىسى "تاڭ لتد" جاۋاپكەرشىلىگى شەكتەۋلى سەرىكتەستىگىنىڭ ديرەكتورى ي.شاعىرتاەۆقا بەرىلدى.
"وتان" وردەنىمەن سۋرەتشى ا.اقاناەۆ، بەلگىلى اقىن، ايتىس ونەرىنىڭ دامۋىنا ەرەكشە ەڭبەك سىڭگەن قايراتكەر ج.ەرمانوۆ ماراپاتتالدى.
ءى دارەجەلى "بارىس" وردەنى ەڭبەك ارداگەرلەرى م.ايىمبەتوۆا مەن س.تيەسوۆكە، قوناەۆ قالاسى ا.جۇبانوۆ اتىنداعى №5 ورتا مەكتەپ مۇعالىمى ن.ليگە، تەلەۆيزيا ارداگەرى ل.سەيىتوۆكە، ءىى دارەجەلى "بارىس" وردەنى قوعام جانە مەملەكەت قايراتكەرى ءا.بەكتاەۆقا، "KAZGOR" جوبالاۋ اكادەمياسىنىڭ ءبىرىنشى ۆيتسە-پرەزيدەنتى ت.ەراليەۆكە، ەڭبەك ارداگەرى و.راحمانبەرديەۆكە، ءىىى دارەجەلى "بارىس" وردەنى اباي وبلىسى قوعامدىق كەڭەسىنىڭ توراعاسى م.اينابەكوۆكە، ش.ءۋاليحانوۆ اتىنداعى كوكشەتاۋ ۋنيۆەرسيتەتىنىڭ كافەدرا مەڭگەرۋشىسى س.اياعانوۆقا، ەركىن كۇرەستەن ەڭبەك سىڭىرگەن سپورت شەبەرى ي.بايرامۋكوۆكە، "قازاقستان حالقىنا" قوعامدىق الەۋمەتتىك قورىنىڭ توراعاسى ب.جامىشەۆكە، قوعام قايراتكەرى ءا.جولشىبەكوۆكە جانە ەڭبەك ارداگەرى س.قىرىمقۇلوۆقا تابىستالدى.
سونىمەن قاتار بەلگىلى عالىمدارعا، مادەنيەت جانە ءبىلىم قايراتكەرلەرىنە، وندىرىستىك سالا وكىلدەرىنە "پاراسات" وردەنى بەرىلدى. ولاردىڭ قاتارىندا تالدىقورعان قالاسى "قاينار-اكب" جشس ديرەكتورلار كەڭەسىنىڭ توراعاسى ق.اجماعانبەتوۆ، "قازاق ءتىلى" حالىقارالىق قوعامىنىڭ ۆيتسە-پرەزيدەنتى ع.انەس، م.وسپانوۆ اتىنداعى باتىس قازاقستان مەديتسينا ۋنيۆەرسيتەتىنىڭ پروفەسسورى ب.جولدين، نىسانا كوزدەۋدەن ۇلتتىق قۇرامانىڭ باس جاتتىقتىرۋشىسى و.دوۆگۋن، تەمىرتاۋ قالاسىنىڭ كوپبەيىندى انا مەن بالا ورتالىعىنىڭ ديرەكتورى س.لوحۆيتسكي، اتىراۋ وبلىستىق ارداگەرلەر كەڭەسىنىڭ تورالقا مۇشەسى م.عابدىسالىموۆا جانە ع. مۇسىرەپوۆ اتىنداعى بالالار مەن جاسوسپىرىمدەرگە ارنالعان مەملەكەتتىك اكادەميالىق قازاق تەاترىنىڭ اكتەرى ۇ.ءنۇسىپالى سەكىلدى ازاماتتار بار.
"ەل بىرلىگى" وردەنى العاش رەت قازاقستان رەسپۋبليكاسىنىڭ پرەزيدەنتى جانىنداعى مەملەكەتتىك باسقارۋ اكادەمياسىنىڭ پروفەسسورى ا.باشماكوۆقا، رەسپۋبليكالىق دۇنگەن ەتنومادەني ورتالىعى باقىلاۋ كەڭەسىنىڭ توراعاسى ل.بۋلاروۆقا، رەسپۋبليكالىق تاجىك ەتنومادەني ورتالىعىنىڭ توراعاسى ا.يسمايلوۆقا، قازاقستان كورەيلەرى قاۋىمداستىعى قامقورشىلىق كەڭەسىنىڭ مۇشەسى ر.كيمگە، "Deutsche Allgemeine Zeitung" رەسپۋبليكالىق نەمىس گازەتىنىڭ باس رەداكتورى و.كليمەنكوعا، "قازاقستان شەشەندەرى مەن ينگۋشتارىنىڭ "ۆايناح" قاۋىمداستىعى" زاڭدى تۇلعالار بىرلەستىگىنىڭ تەڭ توراعاسى ا.مۇرادوۆقا، "دۋستليك" قازاقستان رەسپۋبليكاسى وزبەك ەتنومادەني قوعامدىق بىرلەستىكتەرىنىڭ قاۋىمداستىعى" زاڭدى تۇلعالار بىرلەستىگى توراعاسىنىڭ ورىنباسارى ت.نىشانباەۆقا تابىستالدى.
ت.ابدىكۇلى، س.ەلۋباەۆ، ب.نۇرجەكەەۆ، س.سماتاەۆ، ا.اشيروۆ جانە ل.شاشكوۆا "قازاقستاننىڭ حالىق جازۋشىسى" اتاعىن يەلەندى.
"قازاقستاننىڭ حالىق ءارتىسى" قۇرمەتتى اتاعى ەلىمىزدىڭ كورنەكتى مادەنيەت قايراتكەرلەرى، تەاتر جانە كينو اكتەرلەرى د.احيموۆقا، م.توكارەۆ پەن د.اقمولداعا، وپەرا انشىلەرى ش.ءابىلوۆ پەن ت.كۇزەنباەۆقا، اتاقتى انشىلەر ر.ستامعازيەۆكە، د.قۇدايبەرگەنگە جانە كۇيشى ا.ۇلكەنباەۆاعا بەرىلدى.
سونداي-اق "ۇلتتىق عىلىمي كارديوحيرۋرگيا ورتالىعى" كەاق دارىگەرى س.اندوسوۆا، "م.قوزىباەۆ اتىنداعى سولتۇستىك قازاقستان ۋنيۆەرسيتەتى" كەاق پروفەسسورى ا.پلەشاكوۆ، "شىڭعا ورلەۋ" قق ديرەكتورى ر.سىپابەكوۆا، "ماڭعىستاۋ وبلىستىق مۇگەدەكتىك سپورت كلۋبى" كمم اعا باپكەرى ن.قۇلىشوۆ جانە باسقا دا ازاماتتار "قۇرمەت" وردەنىمەن ماراپاتتالدى.
ونەركاسىپ، ترانسپورت، قۇرىلىس، اۋىل شارۋاشىلىعى جانە باسقا دا ماتەريالدىق ءوندىرىس سالالارىنىڭ 94 جۇمىسشىسى مەن ەڭبەككەرى ءىىى دارەجەلى "ەڭبەك داڭقى" وردەنىن يەلەندى.
ءىى دارەجەلى "دوستىق" وردەنى "العا، پەتەربۋرگ" ينتەرنەت جوباسىنىڭ اۆتورى يۆان چەرۆينسكيگە بەرىلدى.
ال فۋتبولدان قازاقستان ۇلتتىق قۇراماسىنىڭ ويىنشىلارى اسحات تاعىبەرگەن، باحتيور زاينۋتدينوۆ جانە ماكسيم سامورودوۆ "ەرەن ەڭبەگى ءۇشىن" مەدالىنە لايىق دەپ تانىلدى.
"ەرلىگى ءۇشىن" مەدالىمەن مۇرات ەسەنقابىلوۆ پەن تالعاتبەك تولەۋباەۆ ناگرادتالدى. مۇرات ەسەنقابىلوۆ ورتەنىپ جاتقان كولىك ىشىنەن 3 ايەل مەن 5 بالانى امان الىپ قالسا، تالعاتبەك تولەۋباەۆ ءتىلسىز جاۋدى اۋىزدىقتاۋدا ۇلكەن ەرلىك كورسەتكەن.
پارا جەڭىل اتلەتيكا سپورتشىسى، بىرنەشە رەسپۋبليكالىق سايىستاردىڭ جەڭىمپازى ايسۇلۋ سۇلەيمەنوۆاعا "شاپاعات" مەدالى تابىستالدى.
"قازاقستاننىڭ ەڭبەك سىڭىرگەن قايراتكەرى" قۇرمەتتى اتاعى عىلىم جانە مادەنيەت سالالارىنىڭ 31 كورنەكتى وكىلىنە جانە "قازاقستاننىڭ ەڭبەك سىڭىرگەن ۇستازى" قۇرمەتتى اتاعى اقمولا وبلىسى "№4 "بولاشاق" وبلىستىق مامانداندىرىلعان مەكتەپ-ليتسەي-ينتەرناتىنىڭ مۇعالىمى ءۇ.ەڭسەباەۆاعا بەرىلدى. قازاقستان رەسپۋبليكاسىنىڭ قۇرمەت گراموتاسىمەن 143 ادام ناگرادتالدى.
اسكەري جانە قىزمەتتىك بورىشىن ۇلگىلى اتقارعانى، زاڭدىلىق پەن قۇقىقتىق ءتارتىپتى قامتاماسىز ەتۋدە، ەلدىڭ ۇلتتىق قاۋىپسىزدىگى مەن قورعانىس قابىلەتىن نىعايتۋ كەزىندە كورسەتكەن ەرلىگى مەن قاجىر-قايراتى ءۇشىن اسكەري قىزمەتشىلەر مەن قۇقىق قورعاۋ ورگاندارىنىڭ وكىلدەرى ءى جانە ءىى دارەجەلى "داڭق" وردەندەرىمەن، ءىى جانە ءىىى دارەجەلى "ايبىن" وردەندەرىمەن، "ەرلىگى ءۇشىن" جانە "جاۋىنگەرلىك ەرلىگى ءۇشىن" مەدالدارىمەن ماراپاتتالدى.
جالپى بيىلعى مەملەكەتتىك ناگرادالاردى تاعايىنداۋدا قاراپايىم ازاماتتارعا باسىمدىق بەرىلدى. اتاپ ايتقاندا، ماراپاتتالعاندار اراسىندا 298 ۇستاز بەن دەنساۋلىق ساقتاۋ سالاسىنىڭ قىزمەتكەرلەرى، 259 اۋىل شارۋاشىلىعى مامانى، 119 ەڭبەك ارداگەرى، ءوندىرىس سالاسىنىڭ 88 جۇمىسشىسى بار. بۇل – قاراپايىم ەڭبەككەرلەردىڭ مارتەبەسىن اسىرۋعا، قوعامداعى قادىرىن ارتتىرۋعا باعىتتالعان ناقتى قادام.
ايتا كەتەيىك، 1999 جىلدىڭ شىلدە ايىنان باستاپ «قازاقستاننىڭ حالىق ءارتىسى» دەگەن اتاق الىنىپ تاستالىنعان ەدى. كەيىن پرەزيدەنت قاسىم-جومارت توقاەۆتىڭ جارلىعىمەن قايتا قوسىلدى.
