وتكەن كەزەڭنىڭ وكتەم جىلدارى مەن ءولارا شاعىندا «تولارساقتان ساز كەشكەن» ساربازداردىڭ ەرەن ەرلىگىن ۇلت پەن ۇرپاق جادىنان وشپەيتىنى انىق. قايتا جۇردەك ۋاقىت اعىسى العا جىلجىپ، كۇندەلىكتى كۇيبەڭ تىرشىلىك تۇرلەنگەن سايىن جاڭعىرىپ، قوعامدىق-ساياسي قۇنىن ارتىرىپ وتىرعانىن بايقايمىز. بيىل، بارشامىز بەلگىلى، اۋعان ايماعىنان كەزىندەگى كەڭەس اسكەرىنىڭ شىعارىلعانىنا 35 جىل تولدى.
رۋحى بيىك، بولمىسى اسقاق ءاربىر ارداگەردىڭ ەرەن ەرلىگى تاريح بەتتەرىندە قاتتالىپ، قايتپاس قايسارلىقتىڭ نىشانىنا اينالدى. ونىڭ ۇستىنە، جىل سايىن مەملەكەتتىڭ، ەل باسشىسىنىڭ قولداۋىمەن اۋعان سوعىسىنىڭ ارداگەرلەرىنە قولداۋ كورسەتىلىپ كەلەدى. ناقتى ايتقاندا، بەس قازاقستاندىققا كەڭەس وداعىنىڭ باتىرى اتاعى بەرىلدى، 1 ادام «حالىق قاھارمانى» اتاعىن الدى، ەكى ازامات «ايبىن» وردەنىنىڭ تولىق يەگەرى اتاندى، جۇزدەگەن ازاماتتار بۇرىنعى كسرو جانە قازاقستان رەسپۋبليكاسىنىڭ وردەندەرىمەن جانە مەدالدارىمەن ماراپاتتالدى.
قر دەنساۋلىق ساقتاۋ مينيسترلىگى دە ءوز تاراپىنان اۋعان سوعىسىنىڭ شيەلەنىسىندە شيراعان ارداگەرلەرىمىزگە بارىنشا قىزمەت كورسەتىپ وتىر. ماۋسىم سايىن وتان سوعىسىنىڭ ارداگەرلەرىنە ارنالعان رەسپۋبليكالىق كلينيكالىق گوسپيتالىندە ارداقتى ارداگەرلەرىمىز تۇراقتى تۇردە ساپالى ەم قابىلدايدى. ەمحانادا ارداگەرلەرىمىزدىڭ جان ساۋلىعى مەن ءتان ساۋلىعىن ساقتاۋ ءۇشىن بارلىق جاعداي جاسالعان.
سونىمەن قاتار، دەنساۋلىق ساقتاۋ مينيسترلىگى جانە گوسپيتال ۇجىمىنىڭ ۇيىمداستىرۋىمەن جانە «Amanat» پارتياسىنىڭ «ارداگەرلەردى ارداقتايىق» جوباسىنىڭ اياسىندا توعىزىنشى اقپاندا اۋعان سوعىسىنا قاتىسقان ارداگەرلەرىمىزدىڭ قۇرمەتىنە وراي «اۋعاننىڭ اسۋىندا وت كەشكەندەر» اتتى كەش ءوتتى. تاريحي تاعىلىمى مول ءىس-شارادا ەلىمىزدىڭ ءار تارابىنان كەلگەن ارداگەرلەر باس قوسىپ، وتكەن كۇننىڭ ەستەلىكتەرىنە ءۇڭىلدى، تاۋەلسىزدىك تارتۋ ەتكەن بەيبىت كۇننىڭ بەرەكەسىنە بوي جىلىتتى. بار ايماقتان كەلگەن ارداگەردىڭ باسى بىرىككەن سالتاناتتى جيىندى ۇلتتىق قاۋىپسىزدىك كوميتەتى، شەكارا اكادەمياسىنىڭ اسكەري وركەسترى رۋحتى اۋەن، اسەم سازبەن كومكەردى. اۋىر امانات ارقالاپ، ءومىر مەن ءولىم قايشىلاسقان قاندى شايقاسقا قاتىناسقان ماجيتوۆ مارات، اتىكانوۆ اليك، ابدۋشۋكۋروۆ مۋرات، داركەنباەۆ بايداۋلەت، ايدارباەۆ الماسبەك، سايلان بولات، قۇنانباي جۇمات، ماعۇلۇموۆ دۇيسەن، سايبەكوۆ مارات، تاكيرباسوۆ باحىت، تاناباەۆ التىنبەك، مۋحامبەتكاليەۆ كازبەك، پەرمينوۆ ۆالەري، ايدابوسىن ناۋرىزباي، جاناباەۆ اسىلحان، سماكوۆ ماحات، شىلتىناەۆ توكتاباي سىندى ارداگەرلەرىمىزگە العىس حات جانە باعالى سىيلىقتار تابىستالدى.
گوسپيتال باسشىسى گاۋحار تازابەكقىزى مايدانگەرلەردىڭ بيىك بولمىس، ءمارت تۇلعا، باتىر بەينەسى جايلى ايتا كەلىپ:
- اۋعان سوعىسى ارداگەرلەرىنىڭ ءجۇرىپ وتكەن جولى، ونەگەلى ءومىرى مەن ەرەڭ ەڭبەگى – ءبىزدىڭ مەكەمەنىڭ بەرەكەسى دەپ ايتساق ارتىق ەمەس. بۇل تاريحي كۇننىڭ ءمان-ماڭىزى تىم تەرەڭدە جاتىر. سوندىقتان دا حالىق ءۇشىن اۋعان سوعىسى ارداگەرلەرى – جوعارى رۋحتىڭ كورىنىسى. اۋعان سوعىسىنىڭ قاھارماندارىن قادىرلەپ، رۋح جاسامپازدىعىن جاڭعىرتايىق! –دەپ ءوزىنىڭ ىزگى تىلەگىن جاۋدىردى.
كەيىننەن جيىلعان قاۋىم مەن ارداگەرلەردىڭ قۇرمەتىنە اق حالاتتىلار ءوز ونەرىن پاش ەتتى. كوپبەيىندى وڭالتۋ ءبولىمىنىڭ مەيىربيكەسى سوۆەت ايدىن «اۋعانستان» ءانىن شىرقاسا، نەۆرولوگيا ءبولىمىنىڭ قىزمەتكەرى توروكۋلوۆا مينيرا «اۋعانستان قاسىرەتى»، تەراپيا ءبولىمىنىڭ اعا مەيىربيكەسى بالتاباي ءمولدىر «ءان سال سارباز»، كلينيكا-دياگنوستيكالىق ءبولىم مەيىربيكەلەرى «العا قازاق جىگىتتەرى» ءانىن شىرقادى.
سونىمەن قاتار، سازدى كەشتىڭ سارىنى، تاعلىمدى كەزدەسۋدىڭ تالىمىنە بويلاعان ارداگەرلەر گوسپيتال قىزمەتكەرلەرىنىڭ ساپالى قىزمەتىنە ساي بەرىلگەن ماراپاتىن تابىستادى. جىلى لەبىز ءبىلدىرىپ، گوسپيتال اكىمشىلىگى مەن ۇجىمعا العىسىن جاۋدىردى.
كەش سوڭىندا ەستەلىكتەر ايتىلىپ، ۇزاق ۋاقىتقا دەيىن ارداگەرلەر ءوزارا قاۋقىلداسىپ جاتتى. سول كۇنى، راسىندا، كوپشىلىك قۇندى كەشتى عانا قىزىقتاپ قويمادى، ونەرپازداردىڭ ىستىق ىقىلاسى، مەيماناسى تاسىعان ارداگەرلەر مەن ىزەتتى دارىگەرلەر قاۋىمىنىڭ ءاربىر ارەكەتى ەرلىكتىڭ داڭقى ماڭگى وشپەيتىنىن ايعاقتاپ تۇردى.
داستان قاستاي
“ادىرنا” ۇلتتىق پورتالى
