بۇگىن الماتىدا قالا كۇنىنە وراي ۇيىمداستىرىلعان «شابىت بەرگەن الماتى!» رەسپۋبليكالىق پوەزيالىق شىعارمالار بايقاۋى جەڭىمپازدارىن ماراپاتتاۋ ءراسىمى ءوتتى.
ءىس-شاراعا الماتى قالاسى اكىمدىگىنىڭ وكىلدەرى، مادەنيەت جانە ونەر سالاسىنىڭ ماماندارى، شىعارماشىلىق زيالى قاۋىم وكىلدەرى، اقىندار، سونداي-اق قالا تۇرعىندارى مەن قوناقتارى قاتىستى.
بايقاۋ الماتى قالاسى مادەنيەت باسقارماسىنىڭ قولداۋىمەن ءوتتى. ءوتىنىم 15 شىلدە مەن 29 تامىز ارالىعىندا قابىلدانىپ، ەلىمىزدىڭ ءار وڭىرىنەن بارلىعى 269 شىعارما كەلىپ ءتۇستى. بايقاۋدىڭ جالپى جۇلدە قورى – 7,5 ملن تەڭگە.
ءىس-شارا بارىسىندا الماتى قالاسى اكىمىنىڭ ورىنباسارى ابزال نۇكەنوۆ بايقاۋدىڭ ماڭىزدىلىعىنا توقتالىپ، ونىڭ الماتى قالاسى اكىمىنىڭ باستاماسىمەن ۇيىمداستىرىلعانىن اتاپ ءوتتى. ونىڭ ايتۋىنشا، الماتى ءاردايىم مادەنيەت پەن ونەردىڭ ورداسى بولىپ قالا بەرەدى. اقىنداردىڭ شىعارمالارىندا قالانىڭ سۇلۋلىعىنا، تىنىس-تىرشىلىگى مەن ەرەكشە اتموسفەراسىنا دەگەن ايرىقشا سۇيىسپەنشىلىك كورىنىس تاپقان. سونداي-اق ول بايقاۋعا قاتىسقان بارلىق اقىنعا العىس ءبىلدىرىپ، قالا تۇرعىندارى مەن قوناقتارىن قالا كۇنىمەن قۇتتىقتادى.
قازىلار القاسى شىعارمالاردى كوركەمدىك دەڭگەيى، مازمۇنى، اۆتورلىق يدەياسى، تىلدىك شەبەرلىگى جانە كومپوزيتسيالىق ەرەكشەلىكتەرى بويىنشا باعالادى. بايقاۋ قورىتىندىسى بويىنشا ءبىرىنشى ورىن يرانبەك ورازباەۆتىڭ «الماتى – بۇ دۇنيە ءجانناتى (شاھار-ناما)» شىعارماسىنا بەرىلدى.
ەكىنشى ورىندى ەلەنا ابدىحالىقوۆانىڭ «جاس ەدىم كوكىرەگىمدە تاسىعان ءان…» شىعارماسى يەلەندى. ءۇشىنشى ورىن عاني قارلىعاشتىڭ «الماتى: ءۇش ۇرپاق، ءبىر ماحاببات» جانە اقسۇڭقار اقىنباباقىزىنىڭ «الماتىنىڭ رۋحى» شىعارمالارىنا بەرىلدى.
سونىمەن قاتار الماس احمەتبەكۇلى «تولەبي 59»، ادىلعازى قايىربەكوۆ «الماتىم – ازاتتىقتىڭ استاناسى!»، مۇرات شايماران «الماتى. سۇر عيمارات»، ەرعالي باقاش «جاس اقىننىڭ الماتىعا كەلۋى» جانە ولجاس وتار «الماتى مونولوگى» شىعارمالارى ءۇشىن ىنتالاندىرۋ سىيلىقتارىمەن ماراپاتتالدى.
ايتا كەتەيىك، بايقاۋعا ۇسىنىلعان شىعارمالاردا الماتىنىڭ تاريحي، مادەني جانە رۋحاني ماڭىزى، تابيعي سۇلۋلىعى، باي مادەني مۇراسى مەن قالانىڭ زاماناۋي كەلبەتى ءار اۆتوردىڭ وزىندىك پوەتيكالىق كوزقاراسى ارقىلى كورىنىس تاپقان.
بايقاۋ جەڭىمپازى مەن جۇلدەگەرلەرىنىڭ شىعارمالارى «شابىت بەرگەن الماتى!» جيناعىنا جاريالانادى.
