شىعىس قازاقستان وبلىسىنىڭ اكىمى دانيال احمەتوۆ سەمەي قالاسىنا جۇمىس ساپارى بارىسىندا قاراعايلى شاعىن اۋدانىندا بولىپ، بەس كوپ بالالى اناعا جاڭا تۇرعىن ءۇيدىڭ كىلتىن تابىس ەتتى.
پاتەرلەردى ارالاعان ءوڭىر باسشىسى تۇرعىن ۇيلەردىڭ ساپاسىنا ريزا بولدى. د. احمەتوۆ كوپ بالالى انالاردى جاڭا قونىستارىمەن قۇتتىقتاپ، بارلىعىنا دەنساۋلىق پەن باقىت تىلەدى.
- بۇگىن ءبىز ەلباسى نۇرسۇلتان ءابىشۇلى نازارباەۆتىڭ تاپسىرماسى بويىنشا العاشقى قادامدار جاسادىق، - دەدى د. احمەتوۆ. - بيىل كوپبالالى انالارعا 200-دەن استام پاتەر بەرىلەدى. وسى جۇمىستار سەمەي قالاسىندا بولىپ جاتقانىنا قۋانىشتىمىن. بۇل شاعىن اۋدان مەن ءۇشىن ەرەكشە. مەنىڭ ويىمشا، قاراعايلى ەتالوندىق اۋدان بولىپ، سەمەيدىڭ العا قاراي داميتىن ستاندارتتارىن قالىپتاستىرادى.
ءوز كەزەگىندە كوپ بالالى انالار اكىمگە العىس ايتىپ، جىلى لەبىزدەرىن ءبىلدىردى.
- وسىنداي قىمبات سىيلىق ءۇشىن ەلباسىنا راحمەت، - دەدى كوپ بالالى انا ايتبۋبا ايسانوۆا. - بىزگە قۇرمەتپەن قارايتىنى ءۇشىن قۋانىشتىمىن. بارشاڭىزعا بەيبىت اسپان مەن اماندىق تىلەيمىن. بالالارىمىز امان بولسىن. وسىنىڭ ءبارىن ساقتايىق جانە كوبەيتەيىك.
قۇرىلىس سالۋشىلارمەن اڭگىمەلەسۋ بارىسىندا د. احمەتوۆ شاعىن اۋداننىڭ ارحيتەكتۋرالىق كەلبەتىن ارلەندىرۋدى تاپسىردى. جالپى، ايماق باسشىسى قاراعايلى اۋدانىندا سالىنىپ جاتقان تۇرعىن ءۇيدىڭ ساپاسىن جوعارى باعالادى.
