ۇكىمەت «ءتىل ساياساتىن دامىتۋدىڭ 2023-2029 جىلدارعا ارنالعان تۇجىرىمداماسىن بەكىتۋ تۋرالى» ءتيىستى قاۋلىنى قابىلدادى. وعان سايكەس جەكەلەگەن ساياسي مەملەكەتتىك قىزمەتشىلەر قازاق ءتىلىن بىلۋگە مىندەتتى. وسىلايشا قازاق ءتىلى مەملەكەتتىك قىزمەتتىڭ نەگىزگى جۇمىس تىلىنە اينالماق، دەپ حابارلايدى «ادىرنا» ءتىلشىسى.
«قوعامنىڭ بارلىق سالاسىندا مەملەكەتتىك تىلگە باسىمدىق بەرۋدى قالىپتاستىرۋ، مەملەكەتتىك ءتىلدىڭ قولدانىلۋ اياسىن كەڭەيتۋ بويىنشا شارالار قابىلدانادى. تۇجىرىمدامانى جۇزەگە اسىرۋ بارىسىندا جەكەلەگەن ساياسي مەملەكەتتىك قىزمەتشىلەردى قازاق ءتىلىن بىلۋگە مىندەتتەيتىن تالاپتار ازىرلەنەتىن بولادى»،—دەلىنگەن حابارلامادا.
ايتا كەتەيىك، 2029 جىلى قازاقستان حالقىنىڭ 84 پايىزى مەملەكەتتىك ءتىلدى مەڭگەرەدى دەپ كۇتىلۋدە. بۇدان بولەك «قازتەست» جۇيەسى بويىنشا ۆ2 دەڭگەيىندە مەملەكەتتىك ءتىلدى مەڭگەرگەن مەملەكەتتىك قىزمەتشىلەردىڭ ۇلەسى 2029 جىلى 50 پايىز بولادى دەپ جوسپارلانىپ وتىر.
قۇجاتقا جۇكتەلگەن مىندەتتەردى جۇزەگە اسىرۋ ءۇشىن باعدارلامالاردىڭ، كۋرستاردىڭ جانە ءار ءتۇرلى ءىس-شارالاردىڭ ءتىزىمى ەنگىزىلگەن. قاۋلى قول قويىلعان كۇنىنەن باستاپ كۇشىنە ەنەدى.
