تۇركىستان وبلىسىندا قازاقستان-قىتاي يندۋستريالىق پاركى قۇرىلادى. بۇل تۋرالى پرەمەر-مينيستر اسقار ءماميننىڭ تۇركىستان قالاسىنا ساپارى بارىسىندا بەلگىلى بولدى دەپ حابارلايدى "ادىرنا" ۇلتتىق پورتالى "كاراۆان" پورتالىنا سىلتەمە جاساپ.
تۇركىستان وبلىسى اكىمىنىڭ ءباسپاسوز قىزمەتى حابارلاعانداي، وبلىستىق اكىمدىك، قازاقستاننىڭ يندۋستريا جانە ينفراقۇرىلىمدىق دامۋ مينيسترلىگى جانە قىتايلىق KAZAKHSTAN CHN-KZ ELECTRIC INDUSTRIAL PARK كومپانياسى 524 ميلليارد دوللار سوماسىنا ءوزارا تۇسىنىستىك تۋرالى مەموراندۋمعا قول قويعان.
قازاقستان-قىتاي يندۋستريالىق پاركىنىڭ سىزباسى
كەلىسىم نەگىزىندە "تۇركىستان" يندۋستريالىق ايماعىندا قازاقستان-قىتاي يندۋستريالىق پاركى سالىنادى. وندا ەنەرگەتيكالىق جابدىق پەن بۇيىمدار شىعارىلادى دەپ جوسپارلانۋدا.
ايتا كەتسەك، 18 مامىردا ۇكىمەت باسشىسى اسقار مامين جۇمىس ساپارىمەن تۇركىستانعا باردى. ساپار اياسىندا پرەمەر قالانىڭ قۇرىلىس جۇمىستارىن ۋاقىتىلى ىسكە اسىرۋ جانە ءوڭىردىڭ ودان ءارى الەۋمەتتىك-ەكونوميكالىق دامۋىن قامتاماسىز ەتۋ بارىسىن تەكسەردى.
سونداي-اق، ول "TurkistanInternationalAirport" حالىقارالىق اۋەجايى قۇرىلىسىنىڭ ورنىنا كاپسۋلا سالۋ راسىمىنە قاتىستى. وسىدان كەيىن ساياباق پەن "نۇر-سۇلتان" الاڭىنىڭ، نەكە سارايىنىڭ، "Rixos Turkestan" قوناقۇيىنىڭ قۇرىلىسى باستالعان الاڭداردى بارىپ كوردى.
جاڭادان سالىنىپ جاتقان عيماراتتاردى ەلەكتر ەنەرگياسىمەن ۇزدىكسىز قامتاماسىز ەتۋ ماقساتىندا تۇركىستان قالاسىندا "ياسسى" شاعىن ستانتسياسى سالىناتىن بولدى. قازىر ستانتسيانىڭ ىرگەتاسىن قالاۋ جۇمىستارى جۇرگىزىلىپ جاتىر.
ءماميننىڭ تۇركىستان وبلىسىنا جۇمىس ساپارى اياسىندا جالپى سوماسى 750,2 ميلليارد دوللاردى قۇرايتىن بەس قۇجاتقا قول قويىلدى.
