Shymkent polıeıleri esirtki zerthanasyn joıdy, dep habarlaıdy «Adyrna» ulttyq portaly.
Polıııa qyzmetkerleriniń málimetinshe, nashaqorlyqqa jáne esirtki bıznesine qarsy kúres jónindegi keshendi jospar aıasynda arnaıy is-sharalardy ótkizý kezinde qalalyq PD esirtki qylmysyna qarsy is-qımyl basqarmasynyń qyzmetkerleri jergilikti 23 jastaǵy turǵynnyń basqarýyndaǵy Toyota Samrý avtokóligin ustaǵan.
Tekserý barysynda kóliktiń salonynan jalpy salmaǵy 150 grammnan asatyn esirtki tabylyp, tárkilendi. Ustalǵan adamnyń páterin tekserý kezinde jedel ýákilder elektrondy tarazylardy, sıntetıkalyq esirtki jasaýǵa arnalǵan psıhotroptyq jáne ósimdik zattary salynǵan paketterdi, hımııalyq zattarmen jumys isteýge arnalǵan respırator maskasyn, esirtki quraldaryn aralastyrýǵa arnalǵan konteınerlerdi jáne qysymǵa arnalǵan jabdyqty tapty. Sonymen qatar esirtkini oraýǵa qajetti polıetılendi paketter, ızolentalar, ylǵal ótkizbeıtin qurylǵylar men magnıtter tabyldy, – delingen habarlamada.
Saraptama qorytyndysyna sáıkes, tárkilengen esirtki zattarynyń salmaǵy – shamamen 800 gramm, bul asa iri mólsherge jatady. Belgili bolǵandaı, kúdikti tamyzda ınternet arqyly esirtkini oraýshy jáne óndirýshi bolyp jumysqa ornalasqan. Sodan keıin ol elıtalyq turǵyn úı keshenderiniń birinde páter jaldap, sol jerde messendjer arqyly alynǵan nusqaýlardy oryndaı otyryp, satý maqsatynda kúshti esirtkilik áseri bar «spaıs» qospasyn daıyndaǵan.
Qazir er adam tergeý ızolıatorynda qamaýda. Atalǵan jaıtqa qatysty QR QK-niń 297-baby boıynsha sotqa deıingi tergeý amaldary júrgizilip jatyr.
«Adyrna» ulttyq portaly
