پرەزيدەنت سايلاۋى: كانديداتتاردىڭ اتى-ءجونى بيۋللەتەندە قانداي رەتپەن جازىلادى؟

1722
Adyrna.kz Telegram

9 ماۋسىمدا وتەتىن پرەزيدەنت سايلاۋىنا 12 067 475 بيۋللەتەن دايىندالادى

 ورتالىق سايلاۋ كوميسسياسى كەزەكتەن تىس پرەزيدەنت سايلاۋىنا قاجەتتى بيۋللەتەندەردىڭ سانى مەن ءماتىنىن بەكىتتى، دەپ حابارلايدى Sputnik قازاقستان تىلشىسى.

كانديداتتار سايلاۋ بيۋللەتەنىنە مەملەكەتتىك ءتىلدىڭ الىپبيلىك تارتىبىمەن تەگى، اتى، اكەسىنىڭ اتى كورسەتىلە وتىرىپ ەنگىزىلەدى.
وسىعان سايكەس، كانديداتتار بيۋللەتەندە مىناداي تارتىپپەن كورسەتىلەدى:

  • احمەتبەكوۆ جامبىل ءاۋجانۇلى;
  • ەسپاەۆا دانيا ماديقىزى;
  • قوسانوۆ ءامىرجان ساعيدراحمانۇلى;
  • راقىمبەكوۆ تولەۋتاي ساتايۇلى;
  • تاسپيحوۆ امانگەلدى ساتىبالدىۇلى;
  • توقاەۆ قاسىم-جومارت كەمەلۇلى;
  • تۇگەل ءسادى-بەك.

اكىمدىكتەر ءاربىر سايلاۋ ۋچاسكەسى بويىنشا سايلاۋشىلار ءتىزىمىن سايلاۋ كوميسسيالارىنا داۋىس بەرۋ باستالاردان جيىرما كۇن بۇرىن – 20 مامىردا بەرگەن.

"وسى تىزىمدەرگە ساي سايلاۋشىلاردىڭ جالپى سانى 11 947 995 ادامدى قۇرادى. "قازاقستانداعى سايلاۋ تۋرالى" كونستيتۋتسيالىق زاڭنىڭ 37-بابى 2-تارماعىنا سايكەس سايلاۋ بيۋللەتەندەرى سايلاۋشىلاردىڭ جالپى سانىنىڭ 1 پروتسەنتى رەزەرۆىمەن سايلاۋشىلاردىڭ سانىنا تەڭ مولشەردە دايىندالادى. وسىعان بايلانىستى 12 067 475 سايلاۋ بيۋللەتەنىن دايىنداۋ قاجەت", - دەدى ورتالىق سايلاۋ كوميسسياسىنىڭ حاتشىسى سابيلا مۇستافينا.

ونىڭ ايتۋىنشا، ءبىر بيۋللەتەندى دايىنداۋ قۇنى – 11 تەڭگە. سوندا 12 067 475 بيۋللەتەندى دايىنداۋ ءۇشىن 132 ميلليون 742 مىڭ 225 تەڭگە جۇمسالادى.

ورتالىق سايلاۋ كوميسسياسى سايلاۋ بيۋللەتەندەرىن دايىندايتىن تيپوگرافيانى انىقتاپ تا قويدى.

سونداي-اق، بيۋللەتەندەردى قولدان جاساۋدان جانە تيىسىنشە ولاردى بۇرمالاۋدان قورعاۋدى قامتاماسىز ەتۋ ماقساتىندا سايلاۋ بيۋللەتەندەرىنىڭ قورعالۋ دارەجەسى بەلگىلەندى.

سايلاۋ بيۋللەتەندەرى وبلىستىق، رەسپۋبليكالىق ماڭىزى بار قالالار مەن استانانىڭ سايلاۋ كوميسسيالارىنا ءۇش كۇننەن، ياعني 6 ماۋسىمنان ەرتە ەمەس جانە سايلاۋعا دەيىن ءبىر كۇننەن، ياعني 8 ماۋسىمنان كەشىكتىرمەي جەتكىزىلۋى ءتيىس.

 

پىكىرلەر