ازەربايجان پرەزيدەنتى يلحام اليەۆ حانكەندي قالاسىندا ەلدىڭ تۋىن كوتەردى، دەپ حابارلايدى "ادىرنا" ءتىلشىسى "ازاتتىق راديوسىنا" سىلتەمە جاساپ.
ازەربايجان باسشىسى 15 قازاندا تاۋلى قاراباق اۋماعىنا كەلدى. يلحام حەيدارۇلى ايماقتاعى سۋگوۆۋشان سۋ قويماسىن پايدالانۋعا بەرۋ راسىمىنە قاتىستى.
قوجالى قالاسىندا، شۋشين اۋدانىنىڭ مالىبەيلى اۋىلىندا، كياركيدجاحان جانە اسكەران كەنتتەرىندە بولىپ، حودجالا، اگدەرە جانە قاراباقتىڭ باسقا ەلدى مەكەندەرىندە ازەربايجان تۋلارىن كوتەردى.
وسىلايشا، ازەربايجان قاراباقتىڭ تولىق ەگەمەندىگىن قالپىنا كەلتىردى.
حالىقارالىق قۇقىق بويىنشا قاراباق ازەربايجاننىڭ ءبىر بولىگى بولىپ سانالادى. ايماق حالقى نەگىزىنەن ارمياندار بولعان.
19 قىركۇيەكتە ازەربايجان ءبىر كۇندىك اسكەري وپەراتسيانىڭ ناتيجەسىندە تانىلماعان تاۋلى قاراباق رەسپۋبليكاسىنىڭ ۇكىمەتىن كاپيتۋلياتسيالاۋعا ءماجبۇر ەتكەن ەدى. ال تاۋلى قاراباقتىڭ ارميان حالقى قۋعىن-سۇرگىننەن قورقىپ، ۇيلەرىن جاپپاي تاستاپ كەتتى.
بۇۇ باعالاۋى بويىنشا، ايماقتا بىرنەشە اپتا ىشىندە وندا تۇراتىن 120 مىڭ ارمياننىڭ مىڭنان استامى قالعان جوق.
ال ازەربايجان بيلىگى تۇرعىنداردى ايماقتا قالۋعا شاقىردى جانە قاراباقتىڭ ارميان حالقىن قايتا بىرىكتىرۋ تۋرالى كەلىسسوزدەر جۇرگىزۋگە دايىن ەكەنىن مالىمدەدى.
