تاجىكستاننىڭ ءبىر توپ تۇرعىنى ەل پرەزيدەنتى ەمومالي راحمونعا اشىق حات جازىپ، سەگىز جىلعا باس بوستاندىعىنان ايىرىلعان جۋرناليست رۋحشونا حاكيموۆانىڭ جازاسىن جەڭىلدەتۋدى ءوتىندى. «ازيا-پليۋس» باسىلىمىنىڭ حابارلاۋىنشا، حاتقا شامامەن 130 بەلسەندى ايەل قول قويعان، دەپ حابارلايدى "ادىرنا" ۇلتتىق پورتالى فەرعاناعا سىلتەپ.
قوعام بەلسەندىلەرى حاكيموۆانىڭ سوتتالۋى ونىڭ ەكى كىشكەنتاي قىزىنا اۋىر سوققى بولعانىن اتاپ ءوتتى. ولاردىڭ ءبىرى ءالى ەمشەكتەگى ءسابي.
"بۇل ۇكىم ءبىزدى تەرەڭ كۇيزەلىسكە ۇشىراتتى. بىراق ەڭ باستىسى – بۇل شەشىم ونىڭ ەكى كىشكەنتاي قىزى – شاحنۋرا مەن شۋكرونانىڭ ءومىرىن تۇبەگەيلى وزگەرتتى. ولار اناسىنان ايىرىلىپ، مەيىرىمىنەن، قامقورلىعىنان، جىلۋىنان قاعىلدى", – دەلىنگەن حاتتا.
حات اۆتورلارى حاكيموۆانىڭ جازاسىن جەڭىلدەتۋدى عانا سۇراپ وتىرعانىن اتاپ ءوتتى. ولاردىڭ ويىنشا، زاڭ اياسىندا اناعا بالالارىمەن بىرگە بولۋعا مۇمكىندىك بەرەتىن گۋمانيتارلىق شەشىم قابىلداۋعا بولادى.
ء"بىز زاڭدا انانىڭ جاعدايىن ەسكەرىپ، ونىڭ كىشكەنتاي بالالارىن اناسىنان ايىرمايتىن قۇقىقتىق تەتىكتەر بار دەپ سەنەمىز", – دەيدى ولار.
وتكەن جىلى تاجىكستاندا بيلىكتى كۇشپەن باسىپ الۋعا ارەكەتتەندى دەگەن كۇدىكپەن ساياساتكەرلەر مەن ارنايى قىزمەتتىڭ بۇرىنعى قىزمەتكەرلەرى جاپپاي تۇتقىندالدى. قاراشا ايىندا ولاردىڭ ءىسى بويىنشا سوت پروتسەسى باستالىپ، 5 اقپاندا بارلىق ايىپتالۋشىلارعا ۇزاق مەرزىمدى تۇرمە جازاسى تاعايىندالدى.
جۋرناليست رۋحشونا حاكيموۆا مەملەكەتكە وپاسىزدىق جاسادى دەپ تانىلىپ، 8 جىلعا باس بوستاندىعىنان ايىرىلدى. سوت شەشىمى شىققانعا دەيىن ونىڭ ەكى بالاسى بار بولعاندىقتان ول بوستاندىقتا جۇرگەن. الايدا ۇكىم جاريالانعاننان كەيىن سوت زالىندا قاماۋعا الىندى.
تاجىكستاندىق باق مالىمەتىنشە، حاكيموۆانىڭ ءىسى "قىتايدىڭ تاجىكستانعا ىقپالى" تۋرالى جۇرگىزگەن ساۋالناماسىمەن بايلانىستى. بۇل ساۋالناماعا وسى ءىس بويىنشا سوتتالعان سايددجافار ۋسمونزودا (27 جىل) جانە حاكيموۆانىڭ تۋىسى شوكيردجون حاكيموۆ (18 جىل) قاتىسقان.
بەلسەندىلەر ۇكىمەتتەن ادىلەتتى شەشىم كۇتىپ وتىر.
