قر پرەزيدەنتى اكىمشىلىگى باسشىسىنىڭ ءبىرىنشى ورىنباسارى داۋرەن اباەۆ «اشىق ديالوگ 2» سۇحباتىنىڭ كەزەكتى سانىندا پرەزيدەنت جولداۋىندا ايتىلعان بەيبىت اتوم باستاماسىنىڭ ءمانىن ءتۇسىندىردى، دەپ حابارلايدى قازاقپارات.
«پرەزيدەنت قاۋىپسىز ءارى ەكولوگيالىق اتوم ەنەرگەتيكاسىن دامىتۋدىڭ مۇمكىندىگىن زەردەلەۋدى مىندەت ەتىپ قويدى. ءدال قازىر تەك زەردەلەۋ ماسەلەسى عانا تۇر. ەشكىم قازىر جانە ءدال وسى جەردە شەشىم قابىلدا دەپ وتىرعان جوق. ەكىنشى جاعىنان كەلسەك، ءبارىمىز ەنەرگيامەن جابدىقتاۋ سالاسىندا پروبلەما بار ەكەنىن جانە ونىڭ جىل سايىن ارتىپ كەلە جاتقانىن ءتۇسىنۋىمىز كەرەك.
نەگە؟ ويتكەنى ەلدىڭ ەكونوميكاسى، حالقىنىڭ سانى ءوسىپ كەلەدى. سوندىقتان ەنەرگيامەن جابدىقتاۋ ماسەلەسى جىل سايىن وزەكتى بولا تۇسەدى»، - دەگەن داۋرەن اباەۆ ەنەرگيامەن جابدىقتاۋ سالاسىنداعى پروبلەمالاردىڭ العىشارتتارى قازىردىڭ وزىندە سەزىلە باستاعانىن اتادى.
«بۇعان ەشكىمنىڭ داۋى جوق شىعار جانە ءبارى ءتۇسىنىپ وتىرعان دا شىعار. ويتكەنى وزدەرى دە وسى ماسەلەمەن بەتپە-بەت كەلىپ جاتادى. جىلىتۋ ماۋسىمدارى بۇل ماسەلەنىڭ بار ەكەنىن كورسەتىپ وتىر.
مىسالى، ءبىر وڭىردە كومىر تاپشىلىعى پايدا بولسا، كەلەسى وڭىردە باعاسى شارىقتاپ جاتادى. تاعى ءبىر وڭىردە ەلەكتر ۇزىلە بەرەدى دەگەن سياقتى.
جاڭا عانا ايتقانىمداي، تۇتىنۋ كولەمى وسكەن سايىن بۇل ماسەلەنى زەردەلەمەي بولمايدى. ول ماسەلەنى شەشۋدىڭ ءبىر جولى – بەيبىت اتوم. پرەزيدەنت سوندىقتان وسى ماسەلەنى پىسىقتاۋدى تاپسىردى»، - دەدى پرەزيدەت اكىمشىلىگى باسشىسىنىڭ ءبىرىنشى ورىنباسارى.
