دۋشانبەدە جەكسەنبىگە قاراعان ءتۇنى جازاسىن وتەپ جاتقان ءبىر توپ سودىر بۇلىك شىعارىپ، تۇرمەنىڭ ءۇش كۇزەتشىسىن ءولتىردى.
بۇلىك تاجىكستان استاناسى دۋشانبەدەن 15 شاقىرىم جەردە ورنالاسقان كولونيادان شىققان، دەپ حابارلايدى ريا نوۆوستي.
جازاسىن وتەپ جاتقان بۇلىكشىلەر دايش ەكسترەميستىك ۇيىمىنا مۇشە بولعانى ءۇشىن سوتتالعان ەكەن. ولاردىڭ بارلىعى پىشاق جانە باسقا دا وتكىر زاتتارمەن قارۋلانعان.
"شامامەن 30 ادام وزدەرىن بوساتۋدى تالاپ ەتىپ، ءۇش قاراۋىلدى كەپىلگە الىپ، ءولتىرىپ تاستادى", - دەلىنگەن تاجىكستان ادىلەت مينيسترلىگى ءباسپاسوز قىزمەتىنىڭ حابارلاماسىندا.
تۇرمە باسشىلىعى تۇتقىندارمەن بىرنەشە ساعات بويى كەلىسسوز جۇرگىزگەن. الايدا بۇلىكشىلەر كولونيا اكىمشىلىگىنىڭ قىزمەتكەرلەرىنە تاعى دا شابۋىل جاساپ، سالدارىنان كەيبىرى جاراقات الدى.
وسىدان كەيىن تۇزەۋ مەكەمەسىنىڭ باسشىلىعى قاتاڭ شارا قابىلداپ، اباقتىنى كۇشپەن باقىلاۋعا الۋعا ءماجبۇر بولدى. بۇلىك كەزىندە 29 تۇتقىن مەن ءۇش قاراۋىل ءولتىرىلدى، ولاردىڭ سەگىزىن بۇلىكشىلەر وزدەرى جايراتىپ سالعان.
"قازىرگى تاڭدا ۆاحدات كولونياسىندا جاعداي تۇراقتى جانە باقىلاۋعا الىندى", -دەپ حابارلادى تاجىكستاننىڭ ادىلەت مينيسترلىگى.
قۇقىق قورعاۋ ورگاندارى وسى فاكتى بويىنشا تەرگەۋ جۇرگىزىپ جاتىر.
Sputnik
