قاسىم-جومارت توقاەۆ تمد-عا مۇشە ەلدەر اراسىنداعى كوپجاقتى ىقپالداستىقتا ورىس ءتىلى ەرەكشە ءرول اتقاراتىنىن ايتتى، دەپ حابارلايدى «ادىرنا» ءتىلشىسى اقورداعا سىلتەمە جاساپ.
– بيىل تمد-دا «ورىس ءتىلى جىلى» دەپ جاريالانۋىنىڭ سيمۆولدىق ءمانى بار. سونىمەن قاتار ءبىز بۇگىن ورىس تىلىنە قاتىستى حالىقارالىق ۇيىم قۇرۋ تۋرالى شارت پەن جارعىعا قول قويۋ جونىندە تاريحي شەشىم قابىلدايمىز. بۇل ۇيىم دەربەس حالىقارالىق قۇرىلىمعا اينالادى، قۇقىق سۋبەكتىسى رەتىندە تانىلادى. جاڭا ۇيىم بارلىق ەل ءۇشىن اشىق بولادى. ارينە، بۇل – جاھاندىق گۋمانيتارلىق ىنتىماقتاستىق تۇرعىسىنان وتە وزەكتى. تمد كەڭىستىگىندە جانە ودان الدەقايدا كەڭىرەك حالىقارالىق اۋقىمدا ورىس ءتىلىن ناسيحاتتاۋ ءۇشىن قابىلدانىپ جاتقان شارالار ەلدەرىمىزدىڭ ۇلتتىق بىرەگەيلىگىن نىعايتۋ ۇردىسىنە كەرى اسەر ەتپەيدى. قازاقستان قازاق ءتىلىنىڭ مەملەكەتتىك ءتىل مارتەبەسىن كۇشەيتۋ ساياساتىن جالعاستىرا بەرەدى، – دەدى مەملەكەت باسشىسى تمد-عا مۇشە مەملەكەتتەر باسشىلارى كەڭەسىنىڭ وتىرىسىندا .سونداي-اق پرەزيدەنت دوستاستىق ەلدەرىنىڭ ۆولونتەرلەر بىرلەستىكتەرىنىڭ كۇش-جىگەرىن جۇمىلدىرۋ ماڭىزدى ەكەنىنە نازار اۋداردى.
– 2024 جىلدى تمد-دا ۆولونتەرلىك قوزعالىس جىلى دەپ جاريالاۋ باستاماسىن قۇپتايمىز. قازاقستان 2020 جىلدى ۆولونتەر جىلى رەتىندە اتاپ ءوتتى. ەرىكتىلەردىڭ ىزگى امالدارى قوعامىمىزدا تىلەۋلەستىك، مەيىرىمدىلىك جانە جاناشىرلىق قاسيەتتەرىنىڭ تەرەڭ تامىر جايۋىنا ەلەۋلى ۇلەس قوسادى. مۇنداي ادامگەرشىلىك تالپىنىستارعا جان-جاقتى قولداۋ كورسەتۋ ماڭىزدى، – دەدى قاسىم-جومارت توقاەۆ.
ۇقساس جاڭالىقتار
