داريعا نازارباەۆانىڭ بۇرىنعى قۇداسى قايرات بورانباەۆقا قاتىسى بار Phystech II مۇناي كومپانياسى مەملەكەت مەنشىگىنە ءوتتى، دەپ حابارلادى «ادىرنا» ءتىلشىسى KASE-كە سىلتەمە جاساپ.
بۇل كومپانيانىڭ 100% اكتسياسىنىڭ جالپى قۇنى 35,4 ملر تەڭگەگە باعالاندى.
«اكتسيونەرلەر مەملەكەتتىك ورگانداردىڭ بالانسىنا جالپى قۇنى 35 417 122 000 تەڭگەنى قۇرايتىن قوعامنىڭ 13 749 100 جاي اكتسياسىن (100%) مەملەكەت مەنشىگىنە ەرىكتى تۇردە جانە وتەۋسىز وتكىزۋ تۋرالى شەشىم قابىلدادى»، – دەلىنگەن حابارلامادا.
«Phystech II» اق — ماڭعىستاۋ وبلىسىنداعى سولتۇستىك قاراجانباس مۇناي كەن ورنىندا مۇناي مەن گازدى بارلاۋدى جانە ءوندىرۋدى جۇزەگە اسىراتىن جەر قويناۋىن پايدالانۋشى كومپانيا. اقتاۋدا ورنالاسقان كومپانيا اكتسيالارىنىڭ ءبىر بولىگى قايرات بورانباەۆقا تيەسىلى بولعان.
ەسكە سالايىق، 14 قىركۇيەكتە قايرات بورانباەۆ مەملەكەتكە 90 ميلليارد تەڭگەنىڭ مۇلكىن ءوز ەركىمەن قايتارعان ەدى. ونىڭ ىشىندە مۇناي كاسىپشىلىگى، گاز تاراتۋشى كومپانيا، قىزمەت كورسەتۋ كاسىپورنى، قوناق ءۇي جانە ساۋدا-ويىن-ساۋىق كەشەندەرى، فيتنەس-ورتالىقتار جەلىسى مەن كەڭسە كەڭىستىگى بار.
