Darıǵa Nazarbaevanyń burynǵy qudasy Qaırat Boranbaevqa qatysy bar Phystech II munaı kompanııasy memleket menshigine ótti, dep habarlady «Adyrna» tilshisi KASE-ke silteme jasap.
Bul kompanııanyń 100% akııasynyń jalpy quny 35,4 mlr teńgege baǵalandy.
«Akıonerler memlekettik organdardyń balansyna jalpy quny 35 417 122 000 teńgeni quraıtyn qoǵamnyń 13 749 100 jaı akııasyn (100%) memleket menshigine erikti túrde jáne óteýsiz ótkizý týraly sheshim qabyldady», – delingen habarlamada.
«Phystech II» AQ — Mańǵystaý oblysyndaǵy Soltústik Qarajanbas munaı ken ornynda munaı men gazdy barlaýdy jáne óndirýdi júzege asyratyn jer qoınaýyn paıdalanýshy kompanııa. Aqtaýda ornalasqan kompanııa akııalarynyń bir bóligi Qaırat Boranbaevqa tıesili bolǵan.
Eske salaıyq, 14 qyrkúıekte Qaırat Boranbaev memleketke 90 mıllıard teńgeniń múlkin óz erkimen qaıtarǵan edi. Onyń ishinde munaı kásipshiligi, gaz taratýshy kompanııa, qyzmet kórsetý kásiporny, qonaq úı jáne saýda-oıyn-saýyq keshenderi, fıtnes-ortalyqtar jelisi men keńse keńistigi bar.
