استانادا پوليتسيا قىزمەتكەرلەرى ەكى جول-كولىك وقيعاسىنا قاتىسقان Toyota Land Cruiser كولىگىنىڭ جۇرگىزۋشىسىن ۇستادى. رولدە بوكستان وليمپيادا چەمپيونى دانيار ەلەۋسىنوۆ بولعان، دەپ حابارلايدى «ادىرنا» ءتىلشىسى.
الدىن الا مالىمەت بويىنشا، Toyota Land Cruiser جۇرگىزۋشىسى باسقا كولىكتەرمەن سوقتىعىسىپ، وقيعا ورنىنان كەتىپ قالعان.
«جەدەل-ىزدەستىرۋ ءىس-شارالارىنىڭ ناتيجەسىندە كولىك قۇرالى انىقتالىپ، دوستىق كوشەسىندە پوليتسيا قىزمەتكەرلەرى تاراپىنان ۇستالدى. رولدە الكوگولدىك ماساڭدىق بەلگىلەرى بار 35 جاستاعى ەر ادام بولعان»، – دەپ حابارلادى پوليتسيا.
قالالىق پد مالىمەتىنشە، ەكى جول-كولىك وقيعاسىنىڭ سالدارىنان زارداپ شەككەندەر جوق.
قازىرگى ۋاقىتتا اتالعان فاكتى بويىنشا تەكسەرۋ جۇرگىزىلىپ جاتىر. ونىڭ قورىتىندىسى بويىنشا جۇرگىزۋشىنىڭ ارەكەتىنە قۇقىقتىق باعا بەرىلىپ، قازاقستان رەسپۋبليكاسىنىڭ زاڭناماسىنا سايكەس شارالار قابىلدانادى.
