قازاقستاندا مۇعالىمدەر ادىستەمە مەن تەستىلەۋدەن مۇلدەم بوساتىلاتىنى ايتىلدى، دەپ حابارلايدى "ادىرنا" ءتىلشىسى Stan.kz اقپارات اگەنتتىگىنە سىلتەي وتىرىپ.
پرەزيدەنت قاسىم-جومارت توقاەۆ رەسپۋبليكالىق پەداگوگتەر سەزىندە مۇعالىمدەرگە قىسىم كورسەتۋدى توقتاتۋ كەرەكتىگىن مىندەتتەگەن بولاتىن.
"سونىمەن قاتار سالالىق مينيسترلىك بىلىكتىلىك تالاپتارىن ءجيى وزگەرتۋ ارقىلى وقىتۋشىلارعا قىسىم جاساۋدى توقتاتۋى كەرەك ەكەنىن ايتقىم كەلەدى. ويىنا نە كەلسە، سونى ىستەيتىن شەنەۋنىكتەردىڭ جۇگەنسىزدىگىنە توسقاۋىل قويۋ قاجەت. مۇعالىمدەر تىنىش، تۇراقتى جانە الاڭسىز جۇمىس ىستەۋگە قۇقىلى."- دەدى پرەزيدەنت.
پرەزيدەنت پارمەنىنەن كەيىن وقۋ-اعارتۋ مينيسترلىگى سۋ جاڭا رەفورمالاردى قولعا العانىن ايتتى. سونىڭ ءبىرى — بيىلدان باستاپ ۇستازدار قاۋىمى ادىستەمە مەن پەداگوگيكاعا قاتىستى تەستىلەۋدەن مۇلدەم بوساتىلادى.
مينيستر عاني بەيسەمباەۆ مۇعالىمدەردىڭ بالاعا ساپالى ءبىلىم بەرۋىنە مەيلىنشە كوڭىل ءبولۋدى قولعا الاتىنىن ايتتى. اسىرەسە ۇستازداردى اتتەستاتسيالاۋدان وتكىزۋ ءتارتىبى تاعى ءبىر پىسىقتالماق.
بىلىكتىلىگىن ارتتىرۋ ءۇشىن مەكتەپتە ساباق بەرەتىن مۇعالىمدەر تەستىلەۋدەن وتۋدە سەرتيفيكات، ماداقتاما قاعاز، ديپلومدارىن كوشىرمەدەن وتكىزىپ اۋرە-سارساڭعا تۇسەتىن ەدى.
ال قازىر بارلىق قۇجات ەلەكتروندى فورماتتا ساقتالاتىندىقتان، تالاپ ەتىلگەن بۇل نورما دا الىنىپ تاستالدى.
