قازاقستانداعى 97 مىڭنان اسا پەداگوگتىڭ جالاقىسى 2,5 ەسە ارتادى. بۇل تۋرالى وقۋ-اعارتۋ مينيسترلىگى مەكتەپكە دەيىنگى ءبىلىم دەپارتامەنتى مالىمدەدى، دەپ حابارلايدى “ادىرنا” ۇلتتىق پورتالى.
اقپارات بويىنشا، مەملەكەت باسشىسىنىڭ تاپسىرماسىمەن 2020 جىلدىڭ قاڭتارىنان 2023 جىلدىڭ قاڭتارىنا دەيىن تاربيەشىلەردىڭ جالاقىسى جىل سايىن 25% وسكەن. 2023 جىلعى 1 قىركۇيەكتەن باستاپ تاعى 30% وسەدى. وسىلايشا، ەلىمىزدەگى 97 مىڭنان اسا پەداگوگتىڭ جالاقىسى 2,5 ەسە ارتادى.
مەملەكەت باسشىسىنىڭ قولداۋىنىڭ ارقاسىندا ىسكە اسىرىلاتىن پەداگوگتەردىڭ جالاقىسىن جىل سايىن ارتتىرۋ وڭ ناتيجە بەردى. مەكتەپكە دەيىنگى ءبىلىم بەرۋ جۇيەسىنىڭ كادرلىق الەۋەتىن كۇشەيتۋ ماقساتىندا ولاردى دايارلاۋ، بىلىكتىلىگىن ارتتىرۋ جانە اتتەستاتتاۋ جۇيەسىن جەتىلدىرۋ، الەۋمەتتىك مارتەبەسى مەن جالاقىسىن ارتتىرۋ بويىنشا مينيسترلىك جۇيەلى جۇمىس جۇرگىزىپ جاتىر. مەكتەپكە دەيىنگى، ورتا، تەحنيكالىق جانە كاسىپتىك ءبىلىم بەرۋدى دامىتۋدىڭ 2023-2029 جىلدارعا ارنالعان تۇجىرىمداماسى قابىلداندى. ادىستەمەلىك كابينەتتەر جانىنان مەكتەپكە دەيىنگى تاربيە مەن وقىتۋ پەداگوگتەرىنە ادىستەمەلىك كومەك كورسەتۋ ءۇشىن ءموبيلدى توپتار قۇرىلدى، - دەدى دەپارتامەنت ديرەكتورى ناتاليا جۇمادىلداەۆا.
سونداي-اق، «مەكتەپكە دەيىنگى تاربيە جانە وقىتۋ» باعىتى مەن ماماندىعى بويىنشا كادرلار دايارلاۋ 39 جوعارى وقۋ ورنى مەن 119 كوللەدجدە ىسكە اسىرىلادى. كوللەدجدەر وڭىرلىك ەرەكشەلىكتەردى ەسكەرە وتىرىپ، مەكتەپكە دەيىنگى ۇيىمدارمەن بىرگە «پەداگوگ» كاسىبي ستاندارتى نەگىزىندە ءبىلىم بەرۋ باعدارلامالارىن ازىرلەيدى جانە وقۋ باعدارلامالارى مەن جوسپارلارىن جاڭارتادى.
پەدكوللەدجدەرگە قويىلاتىن بىلىكتىلىك تالاپتارى قايتا قارالىپ، بيىل مەكتەپكە دەيىنگى ءبىلىم بەرۋدىڭ 20 مىڭنان اسا پەداگوگى بىلىكتىلىكتى ارتتىرۋ كۋرستارىنان وتەدى.
