دەپۋتات نۇرتورە ءجۇسىپ سەناتتىڭ جالپى وتىرىسىندا قوعامدى جات ءدىني اعىمداردان ىقپالىنان ساقتاۋ كەرەكتىگىن ايتتى، دەپ حابارلايدى «ادىرنا» ءتىلشىسى baq.kz-كە سىلتەمە جاساپ.
«راس، قازاقستان – دەموكراتيالىق، زايىرلى، قۇقىقتىق جانە الەۋمەتتىك مەملەكەت. كونستيتۋتسياعا سايكەس بىزدە ار-وجدان بوستاندىعى بار. يمان – جۇرەكتە. ىزگىلىك – تىلەكتە. ازامات قاي ءدىندى ۇستانادى؟ ونىڭ سەنىم–نانىمى قانداي؟ اركىمنىڭ ءوز ەركى. بۇعان اتا زاڭدا كەپىلدىك بەرىلگەن.
بىراق سولاي ەكەن دەپ ءوزىمىز ءومىر ءسۇرىپ وتىرعان قوعامدى الا تايداي بۇلدىرۋگە، ءوز ءدىني ۇستانىمىن وزگەگە تاڭۋعا، توپ قۇرىپ، جىك-جىككە بولىنۋگە جول بەرۋگە بولمايدى. «دومبىرا – حارام، سالەم سالۋ – حارام، ەلدىڭ ءبارى حيدجاب پەن نيقاب كيۋى كەرەك» دەگەن تالاپتار كونستيتۋتسيامىزعا قايشى كەلەدى. وركەنيەت كوشىن باستاپ كەلە جاتقان مەملەكەتتەر قايدا؟ ءبىز قايدامىز؟ وزىق جۇرت قازىر جاساندى ينتەلەكتپەن، تەحنولوگيالىق جەتىستىكتەرمەن اينالىسىپ جاتقاندا ءبىز ەلىمىزدى ورتا عاسىرداعى دەڭگەيگە سۇيرەمەكپىز بە؟»—دەدى سەناتور.
نۇرتورە ءجۇسىپ ەلىمىزدە دىنگە قىزىعۋشىلاردىڭ ورتاشا جاس مولشەرى جاسارىپ كەلەتىنىن اتاپ ءوتتى.
«ءبىزدىڭ اتا سالتىمىز بار. حالىقتىق قالپىمىز بار. قانشا داۋىردەن بەرى قالىپتاسقان ۇلتتىق قۇندىلىقتارىمىز بار. سولاردىڭ ءبارىن تارك ەتەمىز بە؟ اتا ءدىنىمىزدى ارداقتاۋدىڭ، سالت-ءداستۇرىمىزدى ساقتاۋدىڭ ورنىنا بۇكىل قوعام بولىپ وزگە اعىمداردىڭ جەتەگىندە كەتەمىز بە؟ ماسەلە دابىل قاعارلىق دەڭگەيگە جەتتى. ەلىمىزدە دىنگە قىزىعۋشىلاردىڭ ورتاشا جاس مولشەرى جاسارىپ كەلەدى. بەيرەسمي دەرەكتەرگە سايكەس ءدىني ءبىلىم ىزدەنۋشىلەردىڭ 75%–ى اشىق ينتەرنەت رەسۋرستاردى پايدالانادى. ءوز كەزەگىندە دەسترۋكتيۆتى كۇشتەر اقپاراتتىق كەڭىستىكتىڭ بارلىق مۇمكىندىكتەرىن ءوز قىزمەتىندە وڭتايلى پايدالانىپ وتىر. بۇگىنگى تاڭدا اشىق ينتەرنەت رەسۋرستار ارقىلى، يسلام ءدىنىنىڭ كەيبىر ۇستانىمدارىن العا تارتىپ، سالت-ءداستۇر مەن ۇلتتىق قۇندىلىقتارىمىزدى جوققا شىعارۋعا تىرىسقان كونتەنتتەر كوبەيدى»،—دەپ ءتۇسىندىردى ول.
ايتۋىنشا، حالىقتى جات ءدىني اعىمداردان اراشالاپ الۋعا كومەك كورسەتەتىن ساۋاتتى تەولوگتار مەن يمامدار تاپشى.
«ەلىمىزدە يمامداردى دايىندايتىن 9 مەدرەسە مەن ءبىر عانا ۋنيۆەرسيتەت جۇمىس جاسايدى (نۇر-مۇباراك). ناتيجەسىندە يوردانيا، ەگيپەت، تۇركيا، ساۋد ارابياسى جانە تاعى باسقا شەتەلدەردەن بەيرەسمي ءوز بەتىمەن بارىپ وقىپ جاتقان ازاماتتار از ەمەس. ولاردىڭ ءبىلىمىنىڭ يدەلوگيالىق باعىتى مەن ءداستۇرلى دىنىمىزگە سايكەستىگى سۇراق تۋدىرادى. شەتەلدەردەن ءوز بەتىنشە ءدىني ءبىلىم وقىپ كەلىپ جاتقان ازاماتتاردى، قايتا دايارلىقتان وتكىزەتىن جانە ديپلومدارىن اككرەديتاتسيالايتىن ۇلتتىق داستۋرگە نەگىزدەلگەن ورتالىق قۇرۋدى جانە دە ۇكىمەت، بۇل وزەكتى ماسەلەلەردى قاتاڭ باقىلاۋدا ۇستاۋى كەرەك»،—دەپ تۇيىندەدى دەپۋتات.
