Telegram-ارنالار مەن كەيبىر باق يراندا حيدجابقا قاتىستى جاڭا زاڭنىڭ قابىلدانباي قالعانى تۋرالى مالىمەت تاراتتى، دەپ حابارلايدى "ادىرنا" ۇلتتىق پورتالى.
بۇل زاڭ وتكەن جىلدىڭ سوڭىندا قابىلدانباي قالعان بولاتىن. الايدا تاياۋدا جۇيەنى انىقتاۋ القاسىنىڭ مۇشەسى موحامماد رەزا باحوناردىڭ وسى ماسەلەگە قاتىستى جاۋابىنان كەيىن بۇل تاقىرىپ نەگىزىنەن ءورىستىلدى باق-تا جاڭادان بولعان وقيعا سياقتى حابارلاندى.
«قۇقىق تۇرعىسىنان، حيدجاب تۋرالى زاڭ جوباسى ەندى كۇشىن جوعالتتى، ونى ورىنداۋ مۇمكىن ەمەس. ەندى يراندا حيدجابتى مىندەتتەۋ زاڭدى تۇردە جويىلدى — بۇل ءۇشىن ەشقانداي ايىپپۇل، جازا نەمەسە قۇقىقتىق سالدار بولمايدى. پوليتسياعا دا وسىنى جەتكىزۋلەرىڭىزدى وتىنەمىن»، - دەگەن باحونار.
بىرقاتار ساراپشىلار مەن بۇرىنعى ديپلوماتتار بۇل ءسوزدى ناقتى زاڭدى وزگەرىس ەمەس، ساياسي سيگنال رەتىندە عانا باعالاپ وتىر. ولار زاڭدى تۇردە حيدجابتىڭ مىندەتتى ستاتۋسىن جويۋ ءۇشىن بىرنەشە ينستيتۋتتىڭ — جوعارعى كوشباسشىنىڭ، پارلامەنتتىڭ جانە جۇيەنى انىقتاۋ القاسىنىڭ ماقۇلداۋىن تالاپ ەتەتىن كۇردەلى زاڭنامالىق ءراسىم قاجەت ەكەنىن ەسكەرتەدى.
سونىمەن بىرگە، يراندا قازىرگى ۋاقىتتا حيدجابتى مىندەتتەۋ نورماسى ءالى كۇشىندە. سايكەس ەرەجەلەردى بۇزعان ايەلدەرگە ايىپپۇل سالۋ، ەسكەرتۋ، كەيبىر جاعدايلاردا قاماۋ تۇرىندە سانكتسيالار قولدانىلۋى مۇمكىن.
سوڭعى دەرەكتەرگە ساي، پارلامەنت 2023 جىلى حيدجابقا قاتىستى جاڭا قاتاڭ زاڭ جوباسىن قابىلداعانىمەن، وعان قول قويىلعان جوق..
قورىتا ايتقاندا، قازىرگى ساتتە يراندا حيدجاب مىندەتىن جويۋ تۋرالى زاڭعا وزگەرىس جاسالعان جوق.
