وزبەكستان مەن ءۇندىستاننىڭ سپورتى قارقىندى دامىپ كەتكەن جوق، قازاقستان سپورتى قاتتى قۇلدىراپ كەتكەن. ايتپەسە، قازاقستان ازيادادا 20-24 التىندى وڭاي الاتىن.
جەڭىل اتلەتيكانىڭ باسى-قاسىنداعىلار ءبىر ولگا رىپاكوۆانىڭ، ءجۇزۋ دميتري بالانديننىڭ ارقاسىندا جانى قالىپ، سول سپورتشىلار جەڭگەن التىندى الاۋلاتىپ، ەسەپتەرىنە قامپيتىپ قوساتىن. قىتايداعى ازيا ويىندارىندا رىپاكوۆا ۇزدىك بولعان ءۇش قارعىپ سەكىرۋدەن سپورتشى قوسا المادىق. ازيا ويىندارىندا 3-4 التىن الاتىن جەڭىل اتلەتتەر العاش رەت ازيادادا التىنسىز قالدى.
"سارىارقاداي" ۆەلوترەگى بار ەلدىڭ الەم چەمپيوناتى مەن وليمپيادانى بىلاي قويىپ، ازيا ويىندارىنان التىنسىز قالعانىن...
الەم چەمپيوناتىندا دا، ازيا ويىندارىنان دا التىن الا الماعان دزيۋدودا دا قۇلدىراۋ. تاەكۆوندودان قۇراماداعى بىردە-ءبىر سپورتشى فينالعا شىعا المادى. اۋىر اتلەتيكاداعى بىلىق بۇل سپورتتى تۇعىردان ءتۇسىرىپ تاستادى. اۋىر اتلەتتەردىڭ ازيا ويىندارىندا بەستىككە ەنۋى قيىن.
ترياتلوننان بۇرىن قازاقستان ازيانىڭ الدى ەدى، قازىر بۇل سپورتتاعى مىقتى ءداستۇر ءۇزىلدى. ساداق اتۋدان ءبىر جىلدارى ەرلەر قۇراماسى الەم كۋبوگىندا كورەيا، يران، ءۇندىستاندى جەڭىپ جۇرەتىن ەدى، قازىر سول جىگىتتەردىڭ ناتيجەسى قاتتى ءتۇسىپ كەتتى. مىقتى قۇرامانى قۇلدىرۋىنا نە سەبەپ؟ ەشكىم باس قاتىرىپ جاتقان جوق.
ەل سپورتىندا بۋىن الماسۋ بولىپ جاتىر دەيىن دەسەڭ قۇراما جاسارىپ كەتكەنى شامالى.
بۇكىل ءبىر فەدەراتسيا ءومىر بويى ءبىر سپورتشىعا ارقا سۇيەپ، ءىزباسار دايىنداعاندا وزبەكستان مەن ءۇندىستان وزىپ كەتتى دەپ قاراپ وتىرامىز. 2018 جىلى ازيا ويىندارىندا توعىزىنشى ورىن الىپ قالعاندا-اق ماماندار الدىمەن بۇقارالىق سپورتتى دامىتۋ كەرەگىن، بالالارعا سپورتتى قول جەتىمدى ەتۋ كەرەگىن قايتا-قايتا ايتقان. توكيو، پەكيندەگى ساتسىزدىكتەردەن كەيىن دە وسى ماسەلە كوتەرىلگەن.
ال سالىعىنان ۇلتتىق قۇرامانىڭ اقشاسىن تولەپ وتىرعان حالىقتىڭ بيلىكتەن التىن نەگە از دەپ سۇراۋعا تولىق حاقىسى بار.
