الماتى قالاسى اكىمدىگىنىڭ وكىلدەرى جۋرناليستەرگە تولىقتاي دەرلىك قالپىنا كەلتىرىلگەن اكىمدىك عيماراتىن كورسەتتى، دەپ حابارلايدى "ادىرنا" پورتالى. بۇل تۋرالى khabar.kz جازدى.
كوپكە ءمالىم بولعانداي، ول 2022 جىلعى قاڭتار وقيعاسى كەزىندە ورتتەن قاتتى زارداپ شەككەن. بۇگىنگى تاڭدا ءتورت پاۆيلوننىڭ ۇشەۋى تولىق قالپىنا كەلتىرىلدى، قىزمەتكەرلەر قازىردىڭ وزىندە وندا جۇمىس ىستەي الادى.
الماتى اكىمدىگىنىڭ ورتەنگەن تاريحي عيماراتىن قالپىنا كەلتىرۋ ءۇشىن 17 ميلليارد تەڭگە جۇمسالىپ، مەردىگەر قۇرىلىس ۇيىمدارى قىزمەتكەرلەرىنىڭ ءبىر جىل جەتى اي كۇندىك تىنىمسىز ەڭبەگى قاجەت بولدى. قايتا قۇرۋعا قاراجات رەسپۋبليكالىق بيۋدجەتتىڭ رەزەرۆتىك قورىنان ءتۇستى.
[caption id="" align="alignnone" width="1081"]
فوتو: الماتى قالاسى اكىمدىگى سايتى[/caption]
ەستەرىڭىزگە سالا كەتەيىك، ءورت سالدارىنان عيماراتتىڭ 80 پايىزى قيراپ قالدى. ءورت 6 قابات پەن 4 پاۆيلوندى شارپىعان. ورتكە قارسى جۇيەنىڭ ىسكە قوسىلۋى سالدارىنان جەرتولەدەن سۋ اعىپ كەتكەن.
"قايتا جوندەۋ كەزىندە تاريحي ساۋلەت كەلبەتىن بارىنشا ساقتاۋعا تىرىستىق. بۇرىنعى فوتوسۋرەتتەرمەن سالىستىراتىن بولساق، ءبارى سول كۇيىندە ساقتالعان. مۇندا وزگەرگەن جالعىز نارسە - كەڭەيتىلگەن ءبىرىنشى قاباتتاعى قابىلداۋ بولمەسى" دەدى الماتى قالاسى اكىمى اپپاراتىنىڭ جەتەكشىسى بەيبىت شاحانوۆ.
اكىمدىكتىڭ قاسبەتىندەگى ەسكى كەڭەستىك بەس بۇرىشتى جۇلدىزدار مەملەكەتتىك رامىزدەرى بار بارەلەفتەرمەن اۋىستىرىلدى. قالپىنا كەلتىرۋ كەزىندە ماڭىزدى كريتەري ازاماتتاردىڭ بارلىق ساناتتارى ءۇشىن جايلىلىق پەن كەدەرگىسىز ورتانى قامتاماسىز ەتۋ بولدى. اتاپ ايتقاندا، ەلەكتر ليفتىلەرى، مۇمكىندىگى شەكتەۋلى جاندارعا ارنالعان ۆاننا بولمەلەرى جانە قوزعالىس مۇمكىندىگى شەكتەۋلى جاندارعا ارنالعان ارنايى قۇرال-جابدىقتار – بەلگىلەر، پاندۋستار، شاقىرۋ تۇيمەلەرى، برايل ءالىپبيى پايدا بولدى. اكىمدىكتىڭ ءبىرىنشى قاباتى Open Space Almaty كونتسەپتسياسىنا سايكەس قايتا جاڭعىرتىلدى.
جاڭارتىلعان اكىمدىك عيماراتىندا ورتتەن زارداپ شەككەن جيھازدار تولىعىمەن قالپىنا كەلتىرىلىپ قانا قويماي، جاڭا قىزمەت تۇرلەرى دە پايدا بولدى. مىسالى، ءبىرىنشى قاباتتا فرونت-وفيس نەمەسە قوعامدىق قابىلداۋ بولمەسى اشىق. ازاماتتار وسىندا كەلىپ، ارىز-شاعىمدارىن قالدىرا الادى نەمەسە ءتيىستى ماماندارمەن كەزدەسىپ، قاجەتتى كەڭەستەر الا الادى.
جاڭارتىلعان اكىمدىكتەگى كەڭسەلەردىڭ كونفيگۋراتسياسى، كولەمى مەن ورنالاسۋى وزگەرىسسىز قالدى. عيماراتتا بارلىعى 700 ورىندىق 360 كەڭسە بار. مۇندا 14 باسقارما مەن الماتى قالاسى اكىمىنىڭ اپپاراتى ورنالاسادى. ينجەنەرلىك بولىگى تولىعىمەن جاڭارتىلدى - تىرشىلىكتى قامتاماسىز ەتۋ جۇيەلەرى تسيفرلاندىرىلدى. سونداي-اق عيماراتتا ەلەكتروندى قۇجات اينالىمى جۇيەسىندە ساقتاۋعا ارنالعان قۋاتتى سەرۆەر ورناتىلعان.
"قاۋىپسىزدىك جۇيەلەرىنە سايكەس عيماراتتىڭ بارلىق پەريمەترى مەن بارلىق ىشكى كەڭىستىكتەرى كامەرالارمەن جابدىقتالعان. بۇل عيماراتتا بارلىق كەلۋشىلەردىڭ قوزعالىسىن قاداعالاۋعا مۇمكىندىك بەرەتىن بەينەقابىرعا بار. ادامدار مەن اكىمدىك قىزمەتكەرلەرىنىڭ كەدەرگىسىز ءوتۋى ءۇشىن قاشىقتان قول جەتكىزۋدى باسقارۋ جۇيەسى دە قولدانىلدى. Face ID جۇيەسى پايدالانىلادى. بۇل، شامامەن ايتقاندا، سايكەستەندىرۋدى قاجەت ەتپەيدى. سكانەر بەتتى وقىپ، كىمنىڭ، كىمگە، قانداي ماسەلە بويىنشا كەلگەنىن كورەدى" دەپ جاۋاپ بەردى قۇرىلىس كومپانياسىنىڭ باس ديرەكتورى ءامىرجان نابيەۆ.
قالا اكىمشىلىگى بارلىق قىزمەتكەرلەردىڭ جوندەۋدەن وتكەن عيماراتقا كوشۋىنە شامامەن ەكى اپتا قاجەت دەيدى. تاعى ءبىر جارىم ايدا قۇرىلىسشىلار ءتورتىنشى پاۆيلوندى – 450 ورىندىق كونفەرەنتس-زالدى قايتا جوندەۋدەن وتكىزەدى. اكىمدىك بيىلعى جىلدىڭ سوڭىنا دەيىن تولىققاندى جۇمىسقا كىرىسەدى.
ايتا كەتەيىك، جاڭا اكىمدىك جۇمىسقا دايىن بولعانىمەن قارسى بەتتەگى عيماراتتىڭ ءبىر بولىگى ماتاعا وراۋلى كۇيدە تۇر. ونداعى جوندەۋ جۇمىسى قاشان اياقتالارى بەلگىسىز.
