الماتىدا مۇزافار الىمباەۆتىڭ كىتابى جارىق كوردى. جاڭا تۋىندىدا بالالارعا ارنالعان شىعارمالارى مەن ولەڭدەرى توپتاستىرىلعان.
قازاق پوەزياسىنىڭ كورنەكتى وكىلىنىڭ تۋعانىنا بيىل - 100 جىل. مەرەيلى مەرەيتويى جەر-جەردە ءتۇرلى دەڭگەيدە اتالىپ ءوتىپ جاتىر. بۇگىنگى ءىس-شارا سونىڭ جالعاسى. قالاداعى كرىلوۆ كىتاپحاناسىندا وتكەن جيىنعا جازۋشىنىڭ بالالارى مەن نەمەرەلەرى، قازاق ادەبيەتىنىڭ كورنەكتى تۇلعالارى كەلدى.
– مۇزافار الىمباەۆتىڭ 100 جىلدىعى ەل-ەلدە، جەر-جەردە اتالىپ ءوتىپ جاتىر. بۇل جاراسىمدى. ويتكەنى ول اتاۋسىز، ىزدەۋسىز قالاتىن اقىن-جازۋشى ەمەس. قازاق ادەبيەتى باردا، قازاق ۇلتى باردا مۇزافار الىمباەۆتىڭ ەسىمى وشپەيدى، – دەدى قازاقستان جازۋشىلار وداعى باسقارماسى توراعاسىنىڭ ورىنباسارى بەيبىت سارىباي.
اقىن، ەرتەگى مەن بالالارعا ارنالعان اڭگىمەلەردىڭ اۆتورى، قازاق فولكلورىن جيناۋشى مۇزافار الىمباەۆ ءوز وتانىندا عانا تانىمال ەمەس. ونىڭ پوەزياسى 18 تىلگە اۋدارىلعان. ول – قازاق ادەبيەتىندە سوعىس سۇراپىلىن باستان كەشكەن قالامگەرلەردىڭ ءبىرى. بۇگىنگى جيىندا وقۋشىلار جازۋشىنىڭ شىعارمالارىن وقىپ، كوز كورگەندەر ەستەلىگىن ايتتى.
– ءار داپتەردىڭ شەتىندە ءنومىر ءتۇرتىپ قوياتىن. ءبىر كۇنى سۇراسام، سەرۋەندەگەندە جۇرگەن قادامىن جازىپ جۇرەدى ەكەن. ول ۇلى وتان سوعىسىندا جارالى بولعان. قازىر جاستارعا وتە ىڭعايلى، قادامدى سانايتىن ساعات، تەلەفون بار. ال اتام سول كەزدە ءوزى ساناپ، جازعان، – دەدى م. الىمباەۆتىڭ نەمەرەسى باقتيار الىمباەۆ.
اقپارات: Almaty.tv
