30 قىركۇيەك كۇنى قاراعاندى وبلىسىندا وقۋ-جاتتىعۋ كەزىندە ەكى ورىندىق ۇشاق اپاتقا ۇشىراپ، سالدارىنان ۇشاق كومانديرى مەن اسكەري ينستيتۋتتىڭ كۋرسانتى قازا تاپتى، دەپ حابارلايدى «ادىرنا» ۇلتتىق پورتالى.
ازاماتتىق اۆياتسيا كوميتەتىنىڭ مالىمدەۋىنشە، اۋە اپاتىنان قازا تاپقاندار – 1097 ساعات ۇشۋ تاجىريبەسى بار ۇشاق كومانديرى (ۇشقىش-نۇسقاۋشى) مەن اۋە قورعانىسى كۇشتەرى اسكەري ينستيتۋتىنىڭ كۋرسانتى.«ۇشقىش 28.11.2019 جىلى بەرىلگەن №000012 جارامدى CPL (A) كۋالىگىنە يە. نۇسقاۋشى ۇشقىشتىڭ 01.07.2025 جىلعا دەيىن جارامدى ارنايى بەلگىسى «كاما» زتب-عا ەنگىزىلدى»، - دەدى ازاماتتىق اۆياتسيا كوميتەتى.اتالعان جايتتان كەيىن، قازاقستاننىڭ اۆياتسيالىق اكىمشىلىگىنىڭ باس ديرەكتورى كاتالين رادۋ P2002-JF اۋە ۇشاعىنىڭ اپاتىنا بايلانىستى وپەراتسيالىق ورتالىقتىڭ شۇعىل كەڭەسىن وتكىزدى. جيىندا وپەراتسيالىق ورتالىق قازاقستاننىڭ اۆياتسيالىق اكىمشىلىگىنىڭ اپاتتى جوسپارىن ىسكە قوستى، ۇشۋ قاۋىپسىزدىگىن قامتاماسىز ەتۋ ماسەلەلەرى تالقىلاندى جانە تەرگەۋ جۇرگىزۋ ءۇشىن قۇجاتتار دايىندالدى. سونىمەن بىرگە ازاماتتىق اۆياتسيا كوميتەتى مەن قازاقستاننىڭ اۆياتسيالىق اكىمشىلىگى اۋە اپاتىنان قازا تاپقان ازاماتتاردىڭ تۋىستارى مەن جاقىندارىنا كوڭىل ايتتى. ەسكە سالا كەتەيىك، 2023 جىلدىڭ 30 قىركۇيەگىندە وقۋ-جاتتىعۋ كەزىندە قاراعاندى وبلىسىنداعى بالاپان الاڭىندا P2002 ءتيپتى Upla286 ۇشاعى ساعات 07:46-دا ۇشىپ شىققاننان كەيىن بايلانىسقا شىقپاعان. ىزدەۋ بارىسىندا تالقانى شىققان ۇشاق پەن ەكى ادامنىڭ دەنەسى تابىلعانىن جازعان ەدىك.
«ادىرنا» ۇلتتىق پورتالى
ۇقساس جاڭالىقتار
