پاۆلودارداعى «ماڭگىلىك پولك» شەرۋى

1481

الدىن الا ايتا كەتەيىك، «ماڭگىلىك پولك» شەرۋى كەڭەس وداعى كەزەڭىندە بولعان ەمەس، بەرتىن رەسەي يدەولوگتارى ويلاپ تاۋىپ، جاپپاي قولدانىسقا ەنگىزگەن. كرەملدىڭ ساياسي تەحنولوگتارىنىڭ ىقپالىمەن 2013 جىلدان باستاپ قازاقستاندا وتكىزىلە باستادى.
بۇل اكتسيا سوعىس ارداگەرلەرىنىڭ، تىل ەڭبەككەرلەرىنىڭ ەرلىكتەرى مەن ەرەن ەڭبەكتەرىن قۇرمەتتەۋگە باعىتتالعان كوپتەگەن شارالاردىڭ ەشقايسىنا ۇقسامايدى. ءمان-ماعىناسى تاريحيدان گورى ساياسي رەڭككە يە، شەرۋدىڭ يدەياسى: كەڭەس يمپەرياسىن دارىپتەۋ، كوممۋنيستىك قوعامدى كوكسەۋشىلەردى رۋحتاندىرۋ، ەگەمەن ەلدىكتى قولداۋشىلاردىڭ كوڭىلىنە كۇدىك ۇيالاتۋ.
و دۇنيەلىك ادامداردىڭ پورترەتتەرىن مىڭداعان ادامداردىڭ باستارىنان جوعارى كوتەرىپ ورتالىق كوشەلەردە شەرۋ وتكىزۋى ءدىن، ۇلتتىق ءدىل، مورول تۇرعىسىنان قاراستىرعاندا دا رەتسىز. بۇل ساياسي شارا سوعىس كۋلتىن ناسيحاتتاۋ رەتىندە دە باعالانۋدا.
پاۆلوداردا 9 مامىر كۇنى جەڭىس مەرەكەسى اياسىندا «باتىرلارعا تاعزىم» دەگەن اتپەن وتكىزىلگەن «ماڭگىلىك پولك» شەرۋىنە مىڭداعان ادام قاتىستى، ولاردىڭ ەلەۋلى بولىگىن وقۋشىلار قۇرادى. ەرەسەكتەر سياقتى ولار دا تاياقتاردىڭ ۇشتارىنا بەكىتىلگەن مايدانگەرلەردىڭ پورترەتتەرىن جوعارى كوتەرىپ ءجۇردى. پاۆلودار قالالىق ءبىلىم بەرۋ ءبولىمىنىڭ باسشىسى سامال ايتقازينانىڭ ءوزى وقۋشىلار شەرۋىن قاداعالاعانى بايقالدى.
«ماڭگىلىك پولك» اكتسياسىنا قاتىسۋشىلار اراسىندا ومىراۋلارىنا سەپاراتيزمنىڭ بەلگىسى ىسپەتتەس گريگوري لەنتالارىن قاداعاندار كوپ كەزدەستى، قىزىل تۋلاردى جەلبىرەتە بيىك ۇستاعاندار ءار تۇستان بوي كورسەتتى!
پاۆلودار سوعىس جىلدارىندا مايداننىڭ قاق ورتاسىندا قالعان قاھارمان قالالاردىڭ ساناتىنا جاتپاسا دا، مەرەكەلىك دەمونستراتسيادا مايدان بايراقتارى الىپ ءوتىلدى.
«ماڭگىلىك پولك» شەرۋى شىقپاي تۇرعان كەزەڭدە دە ارداگەرلەر قۇرمەتتەلىنگەن. بۇل اكتسيا وتكىزىلمەسە دە قۇرمەتتەلىنەدى. تۇركىستان، اقتوبە قالالارىندا شەرۋ ۇيىمداستىرماي-اق سوعىستاعى اكەلەردىڭ ەرلىكتەرى، تىلداعى انالار مەن بالالاردىڭ ەرەن ەڭبەكتەرى ۇلىقتالدى!
ايتپاقشى، پاۆلوداردا 7 مامىردا وتان قورعاۋشىلار كۇنى وتكىزىلگەن مەرەكەلىك كونتسەرتتە سوعىس جىلدارىنداعى مايدان اندەرى، پاتريوتتىق اندەر، اۋعان سوعىسىنىڭ ساربازدارى تۋرالى اندەر شىرقالدى. تەك قازاقستان قارۋلى كۇشتەرى جونىندە بىردە-ءبىر ءان باعدارلاماعا ەنگىزىلگەن جوق.
ءبىزدىڭ شەنەۋنىكتەر كەلەسى جىلى جەڭىستىڭ 75 جىلدىق مەرەكەسىندە مادەني شارالاردىڭ بارلىعىن وتانشىلدىق، مەملەكەتشىلدىك رۋحتا ۇيىمداستىرادى دەگەن ۇمىتتەمىز.

ارمان قاني،
پاۆلودار قالاسى.

پىكىرلەر
رەداكتسيا تاڭداۋى
Серіктестер/Партнеры
Студия IMA - создание сайтов Доставка цветов Астана - Lova Buket