2023 جىلى 1 قىركۇيەكتە پارلامەنت پالاتالارىنىڭ بىرلەسكەن وتىرىسىندا قازاقستان رەسپۋبليكاسىنىڭ پرەزيدەنتى قاسىم-جومارت توقاەۆ قازاقستان حالقىنا جولداۋىن تانىستىردى.
سوڭعى 3 جىلدا مەملەكەتتەر كوپ كۇتپەگەن ەكونوميكالىق قيىندىقتارعا تاپ بولدى. سوندىقتان دا الەم ەلدەرى ەكونوميكالىق داعدارىستار مەن قيىندىقتاردى سىناۋ ارقىلى ەڭسەرۋ، ەكونوميكالىق ءوسۋدى ارتتىرۋ جانە ءوسۋ دەڭگەيىن ءبىر قالىپتا ۇستاپ تۇرۋ، ينفلياتسيانىڭ جوعارى دەڭگەيىن تومەندەتۋ باعىتىندا ءوز ساياساتىن دامىتۋدا.
قازاقستان رەسپۋبليكاسى پرەزيدەنتىنىڭ 2023 جىلعى قازاقستان حالقىنا جولداۋىندا حالىقتىڭ ءال-اۋقاتى مەن ءومىر ءسۇرۋ دەڭگەيىن ارتتىرۋ ماقساتىندا ەكونوميكانىڭ تۇراقتىلىعىن ارتتىرۋعا باعىتتالعان جاڭا جوسپاردى ازىرلەۋ قاجەتتىگى باسىمدىق رەتىندە بەرىلگەن.
مەملەكەت باسشىسى حالىققا جولداۋىندا قازاقستاننىڭ ءوسىپ كەلە جاتقان ەكونوميكالىق تاۋەكەلدەردى ەڭسەرە وتىرىپ، تۇراقتى جانە قۋاتتى ەكونوميكاسى بار گۇلدەنگەن ەلگە اينالۋ مۇمكىندىگىنىڭ زور ەكەنىن اتاپ ءوتتى.
بۇل جولداۋدا تاۋ-كەن ءوندىرۋ جانە پايدالى قازبالاردى وڭدەۋ، ەنەرگەتيكا جانە گاز وڭدەۋ، اۋىل شارۋاشىلىعى، ونىڭ ىشىندە اگروونەركاسىپتىك كەشەن سياقتى نەگىزگى ءوندىرىس سەكتورلارىنىڭ ەكونوميكالىق تيىمدىلىگىن ارتتىرۋعا باعىتتالعان مودەل قۇرۋعا باسا نازار اۋدارا وتىرىپ، ءاربىر سالاداعى ەكونوميكالىق ءوسۋدى ارتتىرۋعا باعىتتالعان جاڭا مۇمكىندىكتەر ايقىندالادى.
اسىرەسە، شاعىن جانە ورتا كاسىپكەرلىكتىڭ جالپى ىشكى ونىمدەگى ۇلەسىن ارتتىرۋعا جانە ورتا ونەركاسىپتى كەشەندى دامىتۋ باعدارلامالارىن ازىرلەۋگە، سونداي-اق ازاماتتاردىڭ ءال-اۋقاتىن ارتتىرۋعا باعىتتالعان جوبالار ەرەكشە اتاپ ءوتىلدى.
سونىمەن قاتار، ترانسشەكارالىق سۋ رەسۋرستارىن قورعاۋ جانە قالپىنا كەلتىرۋ، كەز كەلگەن ونەركاسىپ سەكتورىنىڭ قىزمەتى جاڭا ەكونوميكالىق ساياساتتارمەن ۇيلەسەتىن ەكولوگيالىق ىسكە اسىرۋ باستاماسىنا ءتان «جاسىل ەكونوميكانى» قامتيدى.
سىرتقى ەكونوميكانى ۇلعايتۋ، نارىقتا تاۋارلاردى وتكىزۋدەگى مەملەكەتتىك كەدەرگىلەردى ازايتۋ، ينۆەستورلاردى تارتۋعا قولايلى جاعداي جاساۋ سياقتى جاڭا ەكونوميكالىق ساياسات مودەلىن قۇرۋعا كوبىرەك كوڭىل ءبولۋدىڭ ماڭىزدىلىعى دا نازاردان تىس قالعان جوق.
كەز كەلگەن ەلدىڭ دامۋىنىڭ ماڭىزدى كورسەتكىشتەرىنىڭ ءبىرى – سول ەلدەگى حالىق سانىنىڭ ءوسۋى مەن ادام رەسۋرستارى. حالىق پەن ەكونوميكالىق ماسەلەلەر ءبىر-بىرىمەن تىعىز بايلانىستى.
قازاقستان رەسپۋبليكاسى پرەزيدەنتىنىڭ جولداۋىندا حالىقتىڭ تابىس دەڭگەيىنىڭ، ەڭبەكاقى دەڭگەيىنىڭ، ساپالى ءبىلىمنىڭ ارتۋى، ەلىمىزگە قاجەتتى مامانداردى دايارلاۋعا كوڭىل ءبولۋ، مەديتسينالىق كومەكتىڭ قولجەتىمدىلىگىن ارتتىرۋ ماسەلەلەرى جان-جاقتى قامتىلعان.
الداعى ۋاقىتتا قازاقستاننىڭ ەكونوميكالىق دامۋ ساياساتىنىڭ جاڭا مودەلىن ازىرلەۋ ءۇشىن جوعارىدا اتالعان ماسەلەلەرگە كوبىرەك كوڭىل بولىنەتىنى انىق.
ش.امانگۇل
موڭعوليا عىلىم اكادەمياسىنىڭ حالىقارالىق زەرتتەۋلەر ينستيتۋتىنىڭ عىلىمي قىزمەتكەرى
