Ph.D. دوكتور، بەلسەندى داۋرەنبەك نىسانوۆ مەملەكەت باسشىسىنا ەلدەگى تۇيتكىلدى ماسەلەلەردى قوزعاپ حات جولدادى، دەپ حابارلايدى "ادىرنا" پورتالى.
ءوز جازباسىندا ول قازاق قوعامىنا "قاجەتسىز" دەپ ەسەپتەيتىن ساياسي كەلىسىمدەردى، وداقتاردى قوزعاپ "جاڭا قازاقستان" جاساۋدى قولعا الۋ قاجەتتىگىن ايتتى.
"قاسىم-جومارت كەمەلۇلى!
ءار ەلدىڭ ءوز يدەولوگياسى بار ەكەنىن جاقسى بىلەسىز، سونى كورە تۇرا ءوز مەملەكەتىمىزدىڭ يدەولوگياسىن جاساماساڭىز ەگەمەندىگىمىزگە قاۋىپ تونەدى.
ول ءۇشىن:
1) قازاقستاننىڭ اقپاراتتىق كەڭىستىگىن “رەسەيدىڭ بۇقارالىق اقپاراتتىق قۇرالدارىنىڭ” اقپاراتىنان تازارتۋدى قولعا الۋ كەرەك! سەبەبى، ەلىمىزدە رەسەيدىڭ يدەولوگياسىنا قىزمەت ەتەتىن رەسەيشىلدەر كوبەيىپ كەتتى.
2) “ساۋدادا دوستىق جوق” دەگەندى ەسكەرىپ، رەسەيمەن قۇرعان وداقتاردىڭ بارىنەن شىعۋ كەرەك!
سەبەبى، رەسەيگە سالىنعان سانكتسيا ءبىزدىڭ ەكونوميكامىزدى قۇلدىراتىپ جاتىر. ەڭ جامانى رەسەي وزىمەن وداق قۇرعان ەلدەرگە ءوز ۇستەمدىگىن جۇرگىزگىسى كەلەدى، ءوز يدەولوگياسىن تىقپالايدى. ونى تاريح پەن سوڭعى 30 جىل ىشىندەگى وقيعالار دالەلدەپ جاتىر.
3) قازاقستاننىڭ تاۋەلسىزدىگىنە نۇقسان كەلتىرۋگە جول بەرمەيتىن يدەولوگيا بولماسا، قازاقستان ازاماتتارىنا وتان قورعايتىن مەملەكەتشىلدىك سانا قالىپتاستىرا المايسىز.
سەبەبى، “قازاقستان كوپ ۇلتتى مەملەكەت” دەگەندى دوعارماساڭىز “قازاقستان مەنىڭ وتانىم” دەگەن ۇعىمدى ءاربىر ەل ازاماتىنىڭ بويىنا سىڭدىرە المايسىز!
حالىق ءسىزدى “كاسىبي ديپلومات” دەپ ويلايدى. بىراق، ءسىز كاسىبي ديپلومات رەتىندە ءار ءتۇرلى ەتنيكالىق توپتاردان تۇراتىن دياسپورالارى بار مونو ۇلتتى قازاق مەملەكەتىن “كوپ ۇلتتى مەملەكەت” دەپ اتاۋدىڭ دۇرىس ەمەس ەكەنىن بىلەسىز بە؟ بىلمەۋىڭىز مۇمكىن ەمەس!
دەگەنمەن، سولاي اتاۋ ەلىمىزدىڭ يدەولوگياسىنا قارسى ۇعىم ەكەنىن ەسكەرمەگەنىڭىزدى قالاي تۇسىنەمىز؟
سوعان بايلانىستى، ەڭ ءبىرىنشى كەزەكتە ەلىمىزدىڭ بيۋدجەتىنە ارتىق شىعىن كەلتىرەتىن، قوعامنىڭ دۇرىس جولعا تۇسۋىنە ەشقانداي پايداسى جوق، ەلدىڭ ىنتىماقتىعىن ارتتىرا المايتىن تۇككە قاجەتى جوق “قازاقستان حالقى اسسامبلەياسىن” جابۋىڭىزدى سۇرايمىن.
مەنىڭ ايتقاندارىمدى دۇرىس ەمەس دەيتىن بولساڭىز، سىزگە مىسال كەلتىرەيىن. الىسقا بارماي-اق ەكى جاعىمىزداعى كورشىلەرىمىزدى، رەسەي مەن قىتايدى مىسالعا الايىق. رەسەيدىڭ قۇرامىندا 190 ۇلت بار. بىراق ولار وزدەرىن “كوپ ۇلتتى مەملەكەتپىز” دەپ ايتپايدى. رەسەيدە ورىس تىلىنەن باسقا ءتىل جۇرمەيدى. بۇل دۇرىس ۇستانىم جانە مىقتى يدەولوگيا. ويتكەنى، ءبىر عانا تىلدە سويلەيتىن مەملەكەتتىڭ حالقىندا الاۋىزدىق بولمايدى، ىنتىماعى بەرىك بولادى. ول ءاربىر ەل ازاماتىنا مەملەكەتشىلدىك سانانى قالىپتاستىرادى.
سول سياقتى قىتايدا دا 56 ۇلت بار. بىراق ولار وزدەرىن “كوپ ۇلتتى مەملەكەتپىز” دەپ ايتپايدى، ءبىر عانا قىتاي تىلىندە سويلەيدى.
سوندىقتان، مەملەكەت مۇددەسىنە قىزمەت ەتەتىن، وتان قورعايتىن ىنتىماعى مول، ءبىرتۇتاس پاتريوت حالىقتى قالىپتاستىرۋدا قازاقستان كەڭىستىگىندە قازاق تىلىنەن باسقا رەسمي ءتىلدىڭ بولماۋى جانە “كوپ ۇلتتى مەملەكەتپىز” دەگەن الاۋىزدىق تۋدىراتىن ۇعىمدى سانامىزدان ءوشىرۋ ماڭىزدى.
“جاڭا قازاقستان” قۇرىلىسشىسى
داۋرەنبەك مىرزاشۇلى نىسانوۆ" دەلىنگەن بەلسەندىنىڭ حاتىندا.
