نۇرلان قويانباەۆ: 6000 تەڭگەدەن - 30 ملن دوللارلىق يندۋستريا اراسى 20 جىل

نۇرلان قويانباەۆ الەۋمەتتىك پاراقشاسىندا ءوزىنىڭ شىعارماشىلىق جولىن قالاي باستاعانى تۋرالى جازبامەن ءبولىستى، دەپ حابارلايدى “ادىرنا” ءتىلشىسى. تانىمال ازىلكەش، تەلەجۇرگىزۋشى، اكتەر، پروديۋسەر نۇرلان قويانباەۆ الەم جەلىدەگى پاراقشاسىندا ەستەلىكتەرىن بايانداپ، جازبا قالدىردى. ول قازاق كينو يندۋسترياسىندا كومەديا سالاسىن ترەندكە اينالدىرعانداردىڭ ءبىرى. ءوز جازباسىندا ستۋدەنتتىك شاعىنداعى وقيعالارمەن بولىسكەن ازىلكەش كۆن ويناپ ءجۇرىپ، سۇرىنگەنىن دە جاسىرمادى. “… مەكتەپتى التىنمەن ءبىتىرىپ، كازگۋ-گە تاريحشى، پوليتولوگ بولامىن دەپ وقۋعا ءتۇستىم. بولاشاقتا ەلىمىزدىڭ يدەولوگيا سالاسىندا قىزمەت جاسايمىن دەگەن بالا ارمانىم بولعان. 3 كۋرستا تاريح فاكۋلتەتىنىڭ نامىسىن قورعايمىن دەپ اياق استى كۆن ويناي باستادىم. ءبىرىنشى ويىندا، 6 كوماندانىڭ اراسىندا 6-ورىن الىپ، ۇتىلىپ قالدىق. نامىسىما تيگەنى سونشا، 2 جىلدان كەيىن قاتارىنان 2 رەت قازاقستاننىڭ چەمپيونى، 17 رەت “ۇزدىك ويىنشى” اتاعىنا يە بولدىم”،-دەدى. ودان كەيىن نۇرلان قويانباەۆقا 2006 جىلى ماسكەۋدىڭ جوعارى ليگاسىندا ا.ۆ. ماسلياكوۆتىڭ ءوزى “ۇزدىك ويىنشى” اتاعىن بەردى.  وعان ماسكەۋ، سوچي، يۋرمالا قالالارىنداعى بارلىق كۋبوكتاردى ۇتىپ، 2005 جىلدارى،  رەسەيلىك ويىن-ساۋىق تۆ ارنالارى جۇمىسقا شاقىرعان. بىراق، مەديا سالاسىندا جۇرگەن تۇلعا ەلگە قايتىپ قازاق كونتەنتىن دامىتۋدى قولعا العان. ءححى عاسىردىڭ باسىندا قويانباەۆتىڭ باستاۋىمەن تۇسىرىلگەن “شاتاقحانا”، “قىزىق راديو” جوبالارى رەيتىنگى ەڭ جوعارعى تۆ باعدارلامالارىنىڭ بىرىنە اينالعانىن ەسكە سالايىق. نۇرلان قويانباەۆ ءوز جازباسىندا قانشا قينالسا دا كومەديانى تاستاماي، ءتىپتى 6000 تەڭگەگە جۇمىس ىستەگەنىن دە جاسىرمادى. “ول كەزدە كومەديا جانرى ەشكىمگە كەرەك ەمەس جانە دۇرىس باعالانبايتىن ەدى! ستسەناريست رەتىندە 6000 تەڭگە الامىن،ءتىپتى “سىزدەرگە ەفير دە بولادى” دەپ اقشا دا تولەمەگەن كەزدەر دە بولدى. 20 جىل ءوتتى!  كومەديا سالاسىن ترەندكە اينالدىردىق! كينوتەاتردا قازاق كومەدەياسىنىڭ ءداۋىرى باستالدى! قانشاما بيلەتكە جاراتىلاتىن قاراجات بۇرىنعىداي گولليۆۋدقا ەمەس،ەلدە كالىپ جاتىر(كەم دەگەندە 30-40 ملن دوللار)! قازىر ەلىمىزدە 100 كومەديا ءتۇسىرىلىپ جاتىر! 1 كينوعا 300 مىڭ دوللار كەتسە،ورتا ەسەپپەن 100 كومەديا بيۋدجەتى 30 ملن دوللارلىق كينويندۋسترياعا اينالدى”،- دەلىنگەن قويانباەۆ جازباسىندا. تانىمال تۇلعا ارىپتەستەرىنە: “بارلىقتارىڭىز كومەديا تۇسىرە بەرمەي،تاريحي درامالار،موتيۆاتسيالىق كينو تۇسىرىڭىزدەر!”،-دەپ ءوز ويىن تۇيىندەدى.