وزبەكستاندا ساقال قويۋ مەن حيدجاب كيۋگە قارسى ناۋقان قايتا جانداندى، دەپ حابارلايدى «ادىرنا» ءتىلشىسى «راديو وزودليككە» سىلتەمە جاساپ.
باسىلىم رەداكتسياعا بىرنەشە ستۋدەنت قىزدان حات كەلگەنىن جازدى. ولارعا «ورامالدارىڭدى باسقاشا تاعىڭدار» دەگەن شارت قويىلعان. ايتۋلارىنشا، مۇنداي تالاپقا باعىنۋدان باس تارتقاندار وقۋ ورنىنا جىبەرىلمەيدى.
«ءاندىجان قالاسىنداعى بانك كوللەدجىنىڭ ستۋدەنتتەرى اتىنان حابارلاسىپ وتىرمىز. حيدجاب كيەتىندەردەن ورامالدى باسقاشا بايلاپ، ارتقى جاعىنان ءتۇيىن جاساۋدى تالاپ ەتىپ وتىر. بۇل قانشالىقتى زاڭدى؟»— دەيدى شاعىم بىلدىرۋشىلەردىڭ ءبىرى.
«ار-وجدان بوستاندىعى جانە ءدىني ۇيىمدار تۋرالى» زاڭنىڭ 14-بابىندا (جاڭا رەداكتسيادا) وزبەكستان ازاماتتارىنا، ونىڭ ىشىندە ءدىني ۇيىمداردا جۇمىس ىستەيتىندەردى قوسپاعاندا، قوعامدىق ورىنداردا «ءدىني» كيىم كيۋگە رۇقسات ەتىلمەيدى دەپ كورسەتىلگەن.
ستۋدەنتتەر اراسىندا حيدجاب كيۋگە تىيىم ەلدىڭ باسقا ايماقتارىندا دا بايقالادى.
بۇحارا ينجەنەرلىك-تەحنولوگيالىق ينستيتۋتىنىڭ 3-كۋرس ستۋدەنتى فاتيما ابدۋللوح وزبەكستان پرەزيدەنتىنىڭ قىزى سايدا ميرزياەۆاعا ۇندەۋ جاسادى.
«ينستيتۋتتىڭ پرورەكتورى، ونىڭ كەڭەسشىسى، دەكاننىڭ ورىنباسارى مەن تالىمگەرى حيدجابىمدى شەشۋگە ءماجبۇر ەتتى. قۇرمەتتى سايدا شاۆكاتقىزى! حيدجاب كيگەن ستۋدەنتتەردىڭ وقۋ ورىندارىنا بارۋىنا تىيىم سالىنبايدى، سول ءۇشىن بىزدەردى قورعاۋلارىڭىزدى سۇرايمىن. ينستيتۋت باسشىلىعى حيدجابتى شەشۋگە ماجبۇرلەمەي، ساباق جۇرگىزە المايتىن مۇعالىمدەردى تەكسەرسىن»، - دەپ جازدى ول.
ەسكە سالايىق، وتكەن جۇمادا وزبەكستان مۇسىلماندارى باسقارماسىنىڭ باسشىسى، ءمۇفتي نۋريددين حوليكنازاروۆ يسلامدا كيىم كيۋگە قاتىستى قاتاڭ ەرەجەلەر جوق ەكەنىن ايتىپ، وزبەك مۇسىلماندارىن قاراپايىم كيىنۋگە شاقىرعان بولاتىن.
بۇدان بولەك ەلدە ساقال قويۋعا قارسى دا رەيد ءجۇرىپ جاتىر. Facebook قولدانۋشىسى اليحونتۋر شوكيرجون ۋگلي ءوز پاراقشاسىندا تاشكەنتتىڭ سىرگەلى اۋدانىنداعى بازاردا ساقالعا قارسى رەيد وتكەنىن مالىمدەدى. ايتۋىنشا، تەكسەرۋ جۇمىستارى بارىسىندا ساقال قويعان 10 جىگىت ۇستالىپ، كەيىن 15 تاۋلىككە اكىمشىلىك قاماۋعا الىنعان.
«بۇگىن اقشام مەن قۇپتان نامازى اراسىندا قارا بەتپەردە كيگەن ادامدار زاڭگىاتا جانە يانگيۋل اۋداندارىندا تۇراتىن حيدجابتاعى تۇرعىنداردىڭ ۇيلەرىنە باسىپ كىرىپ، ءتىنتۋ جۇمىستارىن جۇرگىزدى. ادامدار ءدىنى مەن نانىم-سەنىمدەرىن جاسىرىپ ءومىر سۇرەتىن زامان كەلدى»، - دەپ جازدى ول.
