Ózbekstanda saqal qoıý men hıdjab kııýge qarsy naýqan qaıta jandandy, dep habarlaıdy «Adyrna» tilshisi «Radıo Ozodlıkke» silteme jasap.
Basylym redakııaǵa birneshe stýdent qyzdan hat kelgenin jazdy. Olarǵa «oramaldaryńdy basqasha taǵyńdar» degen shart qoıylǵan. Aıtýlarynsha, mundaı talapqa baǵynýdan bas tartqandar oqý ornyna jiberilmeıdi.
«Ándijan qalasyndaǵy Bank kolledjiniń stýdentteri atynan habarlasyp otyrmyz. Hıdjab kıetinderden oramaldy basqasha baılap, artqy jaǵynan túıin jasaýdy talap etip otyr. Bul qanshalyqty zańdy?»— deıdi shaǵym bildirýshilerdiń biri.
«Ar-ojdan bostandyǵy jáne dinı uıymdar týraly» zańnyń 14-babynda (jańa redakııada) Ózbekstan azamattaryna, onyń ishinde dinı uıymdarda jumys isteıtinderdi qospaǵanda, qoǵamdyq oryndarda «dinı» kıim kııýge ruqsat etilmeıdi dep kórsetilgen.
Stýdentter arasynda hıdjab kııýge tyıym eldiń basqa aımaqtarynda da baıqalady.
Buhara ınjenerlik-tehnologııalyq ınstıtýtynyń 3-kýrs stýdenti Fatıma Abdýlloh Ózbekstan prezıdentiniń qyzy Saıda Mırzııaevaǵa úndeý jasady.
«Instıtýttyń prorektory, onyń keńesshisi, dekannyń orynbasary men tálimgeri hıdjabymdy sheshýge májbúr etti. Qurmetti Saıda Shavkatqyzy! Hıdjab kıgen stýdentterdiń oqý oryndaryna barýyna tyıym salynbaıdy, sol úshin bizderdi qorǵaýlaryńyzdy suraımyn. Instıtýt basshylyǵy hıdjabty sheshýge májbúrlemeı, sabaq júrgize almaıtyn muǵalimderdi teksersin», - dep jazdy ol.
Eske salaıyq, ótken jumada Ózbekstan musylmandary basqarmasynyń basshysy, múftı Nýrıddın Holıknazarov ıslamda kıim kııýge qatysty qatań erejeler joq ekenin aıtyp, ózbek musylmandaryn qarapaıym kıinýge shaqyrǵan bolatyn.
Budan bólek elde saqal qoıýǵa qarsy da reıd júrip jatyr. Facebook qoldanýshysy Alıhontýr Shokırjon Ýglı óz paraqshasynda Tashkenttiń Sirgeli aýdanyndaǵy bazarda saqalǵa qarsy reıd ótkenin málimdedi. Aıtýynsha, tekserý jumystary barysynda saqal qoıǵan 10 jigit ustalyp, keıin 15 táýlikke ákimshilik qamaýǵa alynǵan.
«Búgin aqsham men quptan namazy arasynda qara betperde kıgen adamdar Záńgiata jáne Iangııýl aýdandarynda turatyn hıdjabtaǵy turǵyndardyń úılerine basyp kirip, tintý jumystaryn júrgizdi. Adamdar dini men nanym-senimderin jasyryp ómir súretin zaman keldi», - dep jazdy ol.
