قازاقستاننىڭ ورتالىق سايلاۋ كوميسسياسىنا قۇجات تاپسىرىپ، مەملەكەتتىك ءتىل ەمتيحانىنان وتكەن جەتى ادامنىڭ ەسىم-سويى بەلگىلى. ەندى ول ازاماتتار قول جيناۋ ناۋقانىنا كىرىسىپ كەتكەن. بۇگىن سول جەتىلىك تۋرالى جازباقپىز...
وسك-عا قۇجات تاپسىرعان 9 ادام:
قاسىم-جومارت توقاەۆ;
دانيا ەسپاەۆا;
جامبىل احمەتبەكوۆ;
تولەۋتاي راحىمبەكوۆ;
ءامىرجان قوسانوۆ;
امانگەلدى تاسپيحوۆ;
سادىبەك تۇگەل;
جۇماتاي اليەۆ;
تالعات ەرعاليەۆ.
ەرعاليەۆ ءوز ەركىمەن باس تارتتى
ورتالىق سايلاۋ كوميسسياسىنا قۇجات تاپسىرعان توعىزىنشى ادام – كاسىپكەر تالعات ەرعاليەۆ ەدى. تالعات ەرعاليەۆ «اق جول» پارتياسىنىڭ وكىلى. پارتيا سەزىندە ىشكى داۋىس بەرۋ كەزىندە دانيا ەسپاەۆادەن از داۋىس جيناپ، ۇمىتكەر اتانا الماعان. كەيىن ول «قازاقستان قۇرىلىسشىلار وداعى» رەسپۋبليكالىق بىرلەستىگىنىڭ اتىنان قۇجات تاپسىرعان. پارتيا توراعاسى ازات پەرۋاشەۆتىڭ كەڭەسىمەن، ول پارتيانىڭ بىرىڭعاي تاڭدالعان كانديداتى دانيا ەسپاەۆانى قولداۋ ءۇشىن ءوز ءوتىنىشىن قايتارىپ الدى.
اليەۆ قازاق ءتىلىن جەتىك بىلمەيتىن بولىپ شىقتى
ال جۇماتاي اليەۆ مەملەكەتتىك ءتىلدى ەركىن مەڭگەرمەگەنڭ سەبەپتى لينگۆيستيكالىق كوميسسيا ەمتيحانىنان وتپەي قالدى. لينگۆيستيكالىق كوميسسيا قورىتىندىسىنا سايكەس، وسك جۇماتاي اليەۆتى پرەزيدەنتتىككە ۇمىتكەر رەتىندە تىركەۋدەن باس تارتتى.
جارىس جولىنداعى جەتەۋدىڭ جاس كاتەگورياسى:
قاسىم-جومارت توقاەۆ – 65 جاستا;
سادىبەك تۇگەل – 64 جاستا;
امانگەلدى تاسپيحوۆ – 60 جاستا;
دانيا ەسپاەۆا – 58 جاستا;
جامبىل احمەتبەكوۆ – 58 جاستا;
تولەۋتاي راحىمبەكوۆ – 55 جاستا;
ءامىرجان قوسانوۆ – 54 جاستا.
پرەزيدەنتتىككە ۇمىتكەر رەتىندە وسك-عا قۇجات تاپسىرعان سەگىز ادامنىڭ ىشىندە 40-50 جاس ارالىعىنداعى بىردە-ءبىر ادام جوق. پوتەنتسيالدى كانديداتتاردىڭ ىشىندە سالىستىرمالى تۇردە ەڭ جاسى – ءامىرجان قوسانوۆ ەكەن.
ءتىل ەمتيحانى
مەملەكەتتىك ءتىلدى ەركىن مەڭگەرگەندىگىن انىقتاۋ ءۇشىن ورتالىق سايلاۋ كوميسسياسى جانىنان قۇرىلعان لينگۆيستيكالىق كوميسسيا وسك-عا قۇجات تاپسىرعان 8 ادانىڭ بارلىعىنان مەملەكەتتىك ءتىل ەمتيحانىن قابىلدادى. ەمتيحان ناتيجەسىندە:
7 ۇمىتكەر مەملەكەتتىك ءتىلدى، قازاق ءتىلىن ەركىن مەڭگەرگەن دەگەن قورتىتىندى جاسالدى. ال وسك-عا سوڭعى بولىپ قۇجات وتكىزگەن جۇماتاي اليەۆ 13 سويلەمنەن 19 قاتە جىبەرىپ، ءتىل ەمتيحانىنان وتپەي قالدى. ال قالعان جەتى ۇمىتكەردىڭ ىشىندە جالعىز سادىبەك تۇگەل جازباشا جۇمىس كەزىندە ازداعان پۋنكتۋاتسيالىق قاتەلىكتەر جىبەرگەن. لينگۆيستيكالىق كوميسسيا قورىتىندىسى بويىنشا، ءارى قاراي جەتى ادام پرەزيدەنتتىك دوداعا قاتىسا الادى.
ەندى وسى قالعان جەتى ۇمىتكەر مەن ولاردى ۇسىنعان ۇيىمدار تۋرالى از-كەم اقپار بەرە كەتكەندى ءجون كوردىك...
قاسىم-جومارت توقاەۆ. توقاەۆتىڭ كانديداتۋراسىن «نۇر وتان» پارتياسىنىڭ سەزىندە پارتيا توراعاسى ۇسىندى.
توقاەۆ بيلىكتەگى باس پارتيانىڭ توراعاسى باسشى بولۋعا لايىق دەپ تانىعان ادام. توقاەۆتىڭ دا ۇلكەن ساياساتتا جۇرگەنىنە وتىز جىلدان استى. جاڭا كادر، جاڭا ادام دەپ ايتا المايسىز.
توقاەۆ – بۇرىنعى كسرو دەيتىن قۇراما ەلدىڭ سىرتقى ىستەر مينيسترلىگىنىڭ بۇرىنعى قىزمەتكەرى. ول – قازاقستاننىڭ بۇرىنعى سىرتقى ىستەر ءمينيسترى. ول – قازاقستاننىڭ بۇرىنعى پرەمەر-ءمينيسترى. ول – قازاقستان سەناتىنىڭ بۇرىنعى توراعاسى. ول – بۇۇ باس حاتشىسىنىڭ بۇرىنعى ورىنباسارى.
دانيا ەسپاەۆا. «اق جول» پارتياسى سەز وتكىزىپ، ءوز ىشىندە داۋىس بەرۋ ارقىلى 6 ۇمىتكەردىڭ ىشىنەن دانيا ەسپاەۆانىڭ كانديداتۋراسىن انىقتادى.
دانيا ەسپاەۆا تاۋەلسىزدىك تاريحىندا قازاقستان پرەزيدەنتتىگىنە ۇمىتكەر تۇڭعىش ايەل ادام. ەسپاەۆا – بۇرىنعى بانك قىزمەتكەرى. بۇرىنعى «بتا بانكتىڭ» بۇرىنعى باس مامانى. بۇرىنعى ءماسليحات دەپۋتاتى. بانك سالاسىندا 30 جىلدان استام ۋاقىت قىزمەت ەتكەن.
جامبىل احمەتبەكوۆ. احمەتبەكوۆتىڭ كانديداتۋراسىن «كوممۋنيستەر» پارتياسى سەزى ۇسىندى. سەزگە قاتىسۋشى دەلەگاتتار ونى ءبىراۋىزدان قولدادى.
جامبىل احمەتبەكوۆ پرەزيدەنتتىككە ەكىنشى رەت تۇسكەلى وتىر. ول – بۇرىن مادەنيەت باسقارماسىن، سوسىن سپورت-تۋريزم باسقارماسىن باسقارعان. ول – بۇرىن قورعالجىڭ اۋدانىندا بىرقاتار قىزمەتتەردى اتقارعان. ول – بۇرىنعى سايلاۋدىڭ بۇرىنعى ۇمىتكەرى بولدى. ول – بۇرىن نۇرسۇلتان نازارباەۆقا جەڭىلگەن.
تولەۋتاي راقىمبەكوۆ. بۇرىنعى اش ۆيتسە-ءمينيسترى راقىمبەكوۆتى «اۋىل» پارتياسى ۇسىنعان. استانادا وتكەن سەزدە ونىڭ كانديداتۋراسى ءبىراۋىزدان ماقۇلداندى.
تولەۋتاي راحىمبەكوۆ – بۇرىنعى بيزنەسمەن. ساتباەۆ قالاسى اكىمىنىڭ، قاراعاندى وبلىسى اكىمىنىڭ بۇرىنعى ورىنباسارى. اۋىلشارۋاشىلىعى مينيسترلىگىنىڭ بۇرىنعى دەپارتامەنت باسشىسى. اتالعان مينيسترلىكتىڭ بۇرىنعى ۆيتسە-ءمينيسترى.
ءامىرجان قوسانوۆ. قوسانوۆتىڭ كانديداتۋراسىن «ۇلت تاعدىرى» رەسپۋبليكالىق قوزعالىسى ۇسىندى. الماتىدا وتكەن قۇرىلتايدا قوسانوۆتىڭ كانديداتۋراسى باسىم داۋىسپەن تاڭدالعان. قۇرىلتايعا قاتىسۋشى جالعىز ادام قوسانوۆقا قارسى داۋىس بەردى.
ءامىرجان قوسانوۆ – بۇرىنعى جۋرناليست. ول – جاستار ءىسى جونىندەگى مەملەكەتتىك كوميتەتتىڭ بۇرىنعى باسشىسى. ول – بۇرىنعى پرەمەردىڭ بۇرىنعى ورىنباسارى. بۇل پرەمەر-ءمينيستردىڭ جانە ۇكىمەتتىڭ بۇرىنعى ءباسپاسوز حاتشىسى. ول – جسدپ-نىڭ بۇرىنعى باسشىلارىنىڭ ءبىرى.
امانگەلدى تاسپيحوۆ. قر كاسىپوداقتار فەدەراتسياسى امانگەلدى تاسپيحوۆتى جانە ەكس-دەپۋتات مۇحتار تىنىكەەۆتى ۇسىنعان. تىنىكەەۆ مەملەكەتتىك ءتىلدى جەتىك مەڭگەرمەگەنىن العا تارتىپ، ءوز ەركىمەن باس تارتتى. ءسويتىپ فەدەراتسيا تاسپيحوۆتى قولداعان.
امانگەلدى تاسپيحوۆ بۇرىنعى ءوندىرىس سالاسىنىڭ قىزمەتكەرى. قر ساۋدا جانە يندۋستريا مينيسترلىگىنىڭ بۇرىنعى قىزمەتكەرى. بۇرىنعى سەنات دەپۋتاتى. بۇرىنعى ءماجىلىس دەپۋتاتى.
سادىبەك تۇگەل. سادىبەك تۇگەل وسك-عا قۇجات تاپسىرعان العاشقى ۇمىتكەر. ونىڭ كانديداتۋراسىن «ۇلى دالا قىراندارى» رەسپۋبليكالىق بىرلەستىگى ۇسىنعان.
سادىبەك تۇگەل بۇرىنعى جۋرناليست. اقمولادا وبلىس اكىمىنىڭ ءباسپاسوز حاتشىسى بولعان. بۇرىن «مەنىڭ قازاقستانىم» قوزعالىسىن باسقارعان.
وسك رەسمي تىركەگەن كانديداتتار:
قاسىم-جومارت توقاەۆ وسك تىركەگەن ەڭ ءبىرىنشى ۇمىتكەر. ول مەملەكەتتىك ءتىل ەمتيحانىن تاپسىرىپ، كوميسسيانىڭ جوعارعى باعاسىن العان.
ول قازاقستاننىڭ 17 وڭىرىنەن 315 910 ازاماتتىڭ قولىن جيناعان. ولاردىڭ 313 653-ءى دۇرىس دەپ تانىلدى.
3 مامىر كۇنى وسك سادىبەك تۇگەلدى رەسمي تۇردە تىركەدى. ول مەملەكەتتىك ءتىل ەمتيحانىنىڭ جازباشا جۇمىسىندا پۋنكتۋاتسيالىق قاتەلىكتەر جىبەرگەن.
سادىبەك تۇگەل قازاقستاننىڭ 15 وڭىرىنەن 122 102 ازاماتتىڭ قولىن جيناعان. ولاردىڭ 120 175-ءى دۇرىس دەپ تانىلعان.
وسك 4 مامىر كۇنى امانگەلدى تاسپيحوۆتى تىركەدى. ول مەملەكەتتىك ءتىل ەمتيحانىن جاقسى تاپسىرعان.
تاسپيحوۆ قازاقستاننىڭ 15 وڭىرىنەن 122 770 ازاماتتىڭ قولىن جيناعان. ولاردىڭ 119 577-ءى راس دەپ تانىلعان. ايتپاقشى، امانگەلدى تاسپيحوۆ الماتى مەن شىمكەنت قالالارىنان قول جيناماعان.
وسك رەسمي تۇردە تىركەگەن ءتورتىنشى كانديدات – دانيا ەسپاەۆا. دانيا ەسپاەۆا وسىعان دەيىن لينگۆيستيكالىق كوميسسيانىڭ جوعارى باعاسىن العان.
ەسپاەۆا قازاقستاننىڭ 17 وڭىرىنەن 144 098 ازاماتتىڭ قولىن جيناعان. ولاردىڭ 139 541-ءى راس دەپ تانىلعان.
ايتا كەتەيىك، وسىعان دەيىن پرەزيدەنتتىككە ۇمىتكەر ءامىرجان قوسانوۆتىڭ شتابى ەلەكتوراتتىڭ 1 پايىز داۋىسىن جيناعانىن، قولداۋشىلاردىڭ جيناعان قولىنىڭ سانى 100 مىڭنان اسقانىن حابارلاعان.
«ادىرنا» ۇلتتىق پورتالى
