قوستاناي وبلىسى، اۋليەكول اۋدانى، نوۆوسەلوۆكا اۋىلىنداعى «كسرو-نىڭ 60 جىلدىعى» مەن «لەنين» كوشەلەرىن جارىقتاندىرۋعا 3 405 892,86 تەڭگە قارجى بولىنگەن، - دەپ حابارلايدى ادىرنا ۇلتتىق پورتالىنىڭ ءتىلشىسى goszakup.gov.kz سايتىنا سىلتەمە جاساپ.
اتالعان تەندەر 24 تامىز كۇنى «كسرو-نىڭ 60 جىلدىعى» مەن «لەنين» كوشەلەرىن جارىقتاندىرۋ» اتتى تاقىرىپپەن جاريالانعان. مەملەكەتتىك ساتىپ الۋدى ۇتۋ ءۇشىن 6 كومپانيا باعىن سىناعان. نەگە ەكەنى بەلگىسىز جەڭىمپاز انىقتالماي جاتىپ، 1 قىركۇيەك كۇنى تەندەر توقتاتىلعان.
ارينە، قازاقستاننىڭ ءار اۋىلىنا جارىق ورناتىلعانى قاجەت. وعان قارسى ەشتەڭە ايتپايمىز. Wikipedia-نىڭ دەرەگىنشە نوۆوسەلوۆكا بار-بولعانى 700 ادام تۇراتىن اۋىل ەكەن. 700 تۇرعىن بار اۋىل بولسا دا، تاۋەلسىز قازاقستان مەملەكەتىنىڭ بيۋدجەتىنىڭ يگىلىگىن كورۋگە حاقىلى.
بىراق، يدەولوگيالىق جاعىنان الساق، جاڭا قازاقستاننىڭ «كسرو-نىڭ 60 جىلدىعى» مەن «لەنين» كوشەلەرىن جارىقتاندىرىپ جاتقانى قۇلاققا جاعىمسىز ەستىلمەي مە؟ تاۋەلسىزدىك العانىمىزعا 30 جىلدان باياعىدا اسىپ كەتتى. سوندا دا سۇيەگى باياعىدا قۋراپ قالعان لەنيندى، سول لەنين قۇرعان كسرو-نى سانامىزدان وشىرە الماعانىمىزعا كىم كىنالى؟
قازىر جاڭا قازاقستان بۇرىنعىنى بىلاي قويىپ، ەسكى قازاقستاندى ايىپتاپ جاتىر. ال، قوستاناي وبلىسىنىڭ يدەولوگياسىنىڭ تىزگىنىن ۇستاعاندار بۇل جايدان حابارسىز بولسا كەرەك...
قانات بىرلىكۇلى،
"ادىرنا" ۇلتتىق پورتالى
