توقاەۆتىڭ سايلاۋالدى شتابى ۇگىت-ناسيحاتقا "پودپيسچيگى" كوپ جۇلدىزداردى تارتپاق

الەۋمەتتىك جەلىلەر قازاقستانداعى سايلاۋدا العاش رەت ۇلكەن ءرول وينايدى. بۇل تۋرالى بۇگىن Nur Otan پارتياسى توراعاسىنىڭ ءبىرىنشى ورىنباسارى ماۋلەن اشىمباەۆ ايتتى، دەپ حابارلايدى Sputnik قازاقستانءتىلشىسى.

پرەزيدەنت سايلاۋىنىڭ ەرەكشەلىگى

اشىمباەۆ بيىلعى پرەزيدەنت سايلاۋىنىڭ ۇلكەن ءبىر ەرەكشەلىگىن اتادى.

"قازاقستانداعى سايلاۋدا العاش رەت الەۋمەتتىك جەلىلەر وتە ۇلكەن ءرول وينايدى. سوندىقتان قوعامدىق شتابتىڭ قىزمەتى اياسىندا ءبىز الەۋمەتتىك جەلىلەردىڭ جۇمىسىنا باسىمدىق بەرەتىن بولامىز",- دەدى اشىمباەۆ قاسىم-جومارت توقاەۆتىڭ رەسپۋبليكالىق قوعامدىق شتابىنىڭ قۇرىلۋىنا ارنالعان بريفينگتە.

ول بيىل شتاب الەۋمەتتىك جەلىلەردى بولەك باعىت رەتىندە قاراستىرىپ وتىرعانىن اتاپ ءوتتى.

"ويتكەنى بۇگىندە قوعامدىق پىكىردى قالىپتاستىرۋدا الەۋمەتتىك جەلىلەردىڭ ءرولى وتە ۇلكەن. بۇرىنعى سايلاۋلاردا جەلىلەر مۇنداي ءرول ويناماعانى بەلگىلى. سوندىقتان وسى سايلاۋدىڭ ۇلكەن ءبىر ەرەكشەلىگى دەپ ايتساق، ارتىق بولمايتىن شىعار", - دەدى پارتيا توراعاسىنىڭ ورىنباسارى.

اشىمباەۆ الەۋمەتتىك جەلىدە ۇگىت-ناسيحات زاڭ اياسىندا جۇرگىزىلەتىنىنە سەندىردى.

ۇگىت-ناسيحاتقا جۇلدىزدار تارتىلادى

"قوعامدىق شتابتىڭ جاستار قاناتىن قۇرىپ جاتقانىمىزدى ايتتىم. جاستار قاناتىنا كانديداتتىڭ سەنىمدى وكىلى بولعان ەلىمىزدەگى تانىمال جۇلدىزدار، جۋرناليستەر، سپورتشىلار كىرەدى. سەنىمدى وكىل رەتىندە ولار ءوز پاراقشالارىندا سايلاۋالدى ۇگىت-ناسيحات جۇرگىزە الادى. ۇگىت-ناسيحات جۇمىستارىنا قاتىسقانى ءۇشىن ولار اقشا المايدى", - دەدى ول.

بىراق، ايتۋىنشا، ەگەر قانداي دا ءبىر پلاتفورمالار، پابليكتەر تارتىلاتىن بولسا، سايلاۋ زاڭناماسىنا سايكەس اقشا تولەنەدى.

وسى ورايدا اشىمباەۆ الەۋمەتتىك جەلىلەردە "جازىلۋشىسى" كوپ تانىمال جاستاردى اتادى.

"قايرات نۇرتاستى ايتا الامىن، مەنىڭ بىلۋىمشە، ونىڭ ميلليوننان استام "پودپيسچيگى" بار. بۇدان باسقا ارتىستەرىمىز، سپورتتا جۇرگەن جۇلدىزدارىمىز بار، ارقايسىسىنىڭ 10, 20, 30 مىڭ "پودپيسچيگى" بار. ءوز پاراقشالارىندا كانديدات تۋرالى وي-پىكىرىن بىلدىرسە دەگەن وتىنىشتەرىمىز بولادى", - دەدى ول.

ايتا كەتسەك، قازاقستان پرەزيدەنتتىگىنە كانديدات قاسىم-جومارت توقاەۆتىڭ رەسپۋبليكالىق قوعامدىق شتابىنا 187 ادام كىرىپ وتىر. ولاردىڭ اراسىندا بەلگىلى مەملەكەت جانە قوعام قايراتكەرلەرى، تانىمال سپورتشىلار، دەپۋتاتتار بار.

بۇعان قوسا، شتاب جانىنان العاش رەت جاستار قاناتى قۇرىلعان. ونىڭ قۇرامىندا قايرات نۇرتاس، قۇرالاي اناربەكوۆا، ايگەرىم ەسەنالى جانە تاعى باسقا تانىمال جۇلدىزدار بار. توقاۆتىڭ رەسپۋبليكا بويىنشا بارلىعى 19,5 مىڭنان استام سەنىمدى وكىلى بولادى.

كەزەكتەن تىس پرەزيدەنت سايلاۋى

قازاقستان پرەزيدەنتى قاسىم-جومارت توقاەۆ 9 ساۋىردە ەل حالقىنا ۇندەۋ جاساپ، ەلدە كەزەكتەن تىس پرەزيدەنت سايلاۋى وتەتىنىن جاريالادى. مەملەكەت باسشىسى سايلاۋدى 2019 جىلدىڭ 9 ماۋسىمىنا بەلگىلەدى.

كانديداتتاردى تىركەۋ 11 مامىرعا دەيىن جالعاسادى.