Toqaevtyń saılaýaldy shtaby áleýmettik jelilerdi bólek baǵyt retinde qarastyryp otyr
Áleýmettik jeliler Qazaqstandaǵy saılaýda alǵash ret úlken ról oınaıdy. Bul týraly búgin Nur Otan partııasy tóraǵasynyń birinshi orynbasary Máýlen Áshimbaev aıtty, dep habarlaıdy Sputnik Qazaqstantilshisi.
Prezıdent saılaýynyń ereksheligi
Áshimbaev bıylǵy prezıdent saılaýynyń úlken bir ereksheligin atady.
"Qazaqstandaǵy saılaýda alǵash ret áleýmettik jeliler óte úlken ról oınaıdy. Sondyqtan qoǵamdyq shtabtyń qyzmeti aıasynda biz áleýmettik jelilerdiń jumysyna basymdyq beretin bolamyz",- dedi Áshimbaev Qasym-Jomart Toqaevtyń respýblıkalyq qoǵamdyq shtabynyń qurylýyna arnalǵan brıfıngte.
Ol bıyl shtab áleýmettik jelilerdi bólek baǵyt retinde qarastyryp otyrǵanyn atap ótti.
"Óıtkeni búginde qoǵamdyq pikirdi qalyptastyrýda áleýmettik jelilerdiń róli óte úlken. Burynǵy saılaýlarda jeliler mundaı ról oınamaǵany belgili. Sondyqtan osy saılaýdyń úlken bir ereksheligi dep aıtsaq, artyq bolmaıtyn shyǵar", - dedi partııa tóraǵasynyń orynbasary.
Áshimbaev áleýmettik jelide úgit-nasıhat zań aıasynda júrgiziletinine sendirdi.
Úgit-nasıhatqa juldyzdar tartylady
"Qoǵamdyq shtabtyń jastar qanatyn quryp jatqanymyzdy aıttym. Jastar qanatyna kandıdattyń senimdi ókili bolǵan elimizdegi tanymal juldyzdar, jýrnalıster, sportshylar kiredi. Senimdi ókil retinde olar óz paraqshalarynda saılaýaldy úgit-nasıhat júrgize alady. Úgit-nasıhat jumystaryna qatysqany úshin olar aqsha almaıdy", - dedi ol.
Biraq, aıtýynsha, eger qandaı da bir platformalar, pablıkter tartylatyn bolsa, saılaý zańnamasyna sáıkes aqsha tólenedi.
Osy oraıda Áshimbaev áleýmettik jelilerde "jazylýshysy" kóp tanymal jastardy atady.
"Qaırat Nurtasty aıta alamyn, meniń bilýimshe, onyń mıllıonnan astam "podpıschıgi" bar. Budan basqa ártisterimiz, sportta júrgen juldyzdarymyz bar, árqaısysynyń 10, 20, 30 myń "podpıschıgi" bar. Óz paraqshalarynda kandıdat týraly oı-pikirin bildirse degen ótinishterimiz bolady", - dedi ol.
Aıta ketsek, Qazaqstan prezıdenttigine kandıdat Qasym-Jomart Toqaevtyń respýblıkalyq qoǵamdyq shtabyna 187 adam kirip otyr. Olardyń arasynda belgili memleket jáne qoǵam qaıratkerleri, tanymal sportshylar, depýtattar bar.
Búǵan qosa, shtab janynan alǵash ret jastar qanaty qurylǵan. Onyń quramynda Qaırat Nurtas, Quralaı Anarbekova, Áıgerim Esenáli jáne taǵy basqa tanymal juldyzdar bar. Toqavtyń respýblıka boıynsha barlyǵy 19,5 myńnan astam senimdi ókili bolady.
Kezekten tys prezıdent saılaýy
Qazaqstan prezıdenti Qasym-Jomart Toqaev 9 sáýirde el halqyna úndeý jasap, elde kezekten tys prezıdent saılaýy ótetinin jarııalady. Memleket basshysy saılaýdy 2019 jyldyń 9 maýsymyna belgiledi.
Kandıdattardy tirkeý 11 mamyrǵa deıin jalǵasady.
