“ەڭ كورىكتى جەردەن ايىرىلىپ قالامىز”. دەپۋتات كولساي كولىنە كوڭىل ءبولۋدى ۇسىندى

6 قىركۇيەك كۇنى وتكەن ءماجىلىس وتىرىسىندا دەپۋتات دانيار قاسقاراۋوۆ الماتى وبلىسىنداعى كولساي كولىنىڭ قازىرگى تابيعي جاعدايىن ايتىپ، نازارعا الىنىپ، مەملەكەتتىك مەنشىككە قايتارۋدى ۇسىندى، دەپ جازادى "ادىرنا". «ەندى كاسىپكەرلەر قوناقۇي، باسسەين، ءدامحانا سالىپ جاتىر. مالىمەت بويىنشا بىردە-بىرەۋىنىڭ قۇرىلىس سالۋعا رۇقسات قاعازدارى جوق. جەر ماقساتسىز پايدالانىلۋدا. ال ۇلتتىق پارك اۋماعىندا كاپيتالدى قۇرىلىس جۇرگىزۋگە بولمايدى دەگەن ەرەجەنى ەشكىم ەلەمەيدى. قۇزىرلى ورىندار دا ونى تەكسەرۋگە، شارا قولدانۋعا قۇلىقسىز»، - دەيدى ول. رەسمي مالىمەت بويىنشا سوڭعى ءبىر جارىم جىلدا «كولساي» كولدەرىنە جارتى ميلليون تۋريست كەلگەن. كولدىڭ اينالاسىندا بوس جەر جوق. «اينالانىڭ بارىنە شامامەن ءۇش جۇزدەي كيىز ءۇي مەن تاماقتانۋ شاتىرلارى تىگىلگەن. ەشقايسىسىندا دارەتحانا جوق. تاۋلى ايماقتا كارىز جۇيەسى بولماعاندىقتان شايىندى سۋلار مەن ءناجىس جەرگە ءسىڭىپ جاتىر. سەپتيك، اسسەنيزاتور دەگەن اتىمەن جوق. وسىلايشا تۇمسا تابيعاتتىڭ ەكولوگياسى بۇزىلۋدا. قالا بەردى ءتۇتىنى بۋداقتاعان كولىكتەر كولدىڭ باسىنا دەيىن بارادى»، - دەيدى ول. ال الماتىداعى مەدەۋ مەن شىمبۇلاق شاتقالدارىنا تەك ەلەكتروموبيلدەردىڭ كىرۋىنە عانا رۇقسات بەرىلگەن. ەكەۋىنىڭ دە ۇلتتىق پارك دەگەن مارتەبەسى بار. سوندىقتان دەپۋتات كولسايعا دا سونداي شەكتەۋ ەنگىزبەسەك، ەندى 5-6 جىلدا ەلىمىزدەگى ەڭ كورىكتى جەردەن ايىرىلىپ قالامىز دەپ دابىل قاعادى. «ءبىز سىرتقا كەتكەن اكتيۆتەردى قايتارامىز دەپ جاڭا زاڭ قابىلدادىق.  ەل ىشىندە دە كەزىندە قولدى بولعان، ارزان باعاعا ساتىلعان، زاڭسىز وزگەنىڭ يەلىگىنە وتكەن وسىنداي شۇرايلى، ەرەكشە قورعاۋدى قاجەت ەتەتىن جەرلەر بار. ارنايى كوميسسيا قۇرىلىپ، سولارعا كەشەندى تەكسەرۋ كەرەك. وسى رەتتە جالعىز كولساي عانا ەمەس، بارلىق ۇلتتىق پارك اۋماعىنداعى ساتىلعان، ۇزاق جىلعا جالعا بەرىلگەن بارلىق جەردىڭ زاڭدىلىعىن تەكسەرىپ، مەملەكەت مەنشىگىنە قايتارۋ قاجەت دەپ سانايمىن»، - دەيدى ول.

"ادىرنا" ۇلتتىق پورتالى