تۇرعىن ءۇي باعدارلامالارى بويىنشا باستاپقى جارنانى الىپ تاستاۋ ۇسىنىلدى. بۇل تۋرالى ءماجىلىس دەپۋتاتى گاۋھار تاناشەۆا كوپبالالى، تولىق ەمەس جانە مۇگەدەكتىگى بار بالالاردى تاربيەلەپ وتىرعان وتباسىلار ءۇشىن مەملەكەتتىك تۇرعىن ءۇي باعدارلامالارىن قايتا قاراۋدى ۇسىندى، دەپ حابارلايدى “ادىرنا” ءتىلشىسى.
2023 جىلعا “باقىتتى وتباسى” باعدارلاماسىنا 3176 وتىنىشكە، “شاڭىراق” باعدارلاماسىنا 3610 وتىنىشكە 71,9 ملرد تەڭگە ءبولىندى. بۇل باسپانا كەزەگىندە تۇرعان 415 700 ادامنىڭ بيىل تەك 6 786 ءوتىنىشى ماقۇلدانادى دەگەن ءسوز. بۇل يپوتەكا بويىنشا باسپانا الا الاتىن مۇقتاجداردىڭ جالپى سانىنىڭ 1,6% قۇرايدى، - دەدى تاناشەۆا.
دەپۋتات كوپبالالى، تولىق ەمەس جانە مۇگەدەكتىگى بار بالالاردى تاربيەلەپ وتىرعان وتباسىلارعا يپوتەكالىق نەسيەنى قولجەتىمدى ەتۋ قاجەت ەكەنىن ايتتى.
تۇرعىن ءۇي كەزەگىنە تۇرۋ ءۇشىن تۇراقتى تۇرعىلىقتى جەرى بويىنشا ءۇش جىلدان استام تىركەۋ بولۋعا مىندەتتى. ءىس جۇزىندە حالىق اقىلى تىركەۋ پروبلەماسىنا تاپ بولادى: بۇل سىبايلاس جەمقورلىقتى تۋدىرادى، ازاماتتاردى وسىلايشا زاڭسىزدىقتارعا يتەرمەلەيدى. سونداي-اق تۇراقتى، جاقسى جالاقى الاتىن جۇمىس كەرەك. سوڭعى التى ايداعى وتباسىنىڭ جيىنتىق تابىسى جوعارى بولۋى كەرەك. ال يپوتەكانى ماقۇلداۋداعى ماڭىزدى ساتتەردىڭ ءبىرى – جاقسى نەسيە تاريحىنىڭ بولۋى. بىراق وسى ءۇش ساناتتاعى وتباسىلار نەسيەنى وتەۋ ماسەلەسىنە ءجيى تاپ بولادى جانە ولاردىڭ بارلىعىندا نەسيە تاريحىندا كورسەتىلگەن كەشىكتىرىلگەن تولەمدەر بار. وسىعان بايلانىستى ولار يپوتەكاعا پاتەر ساتىپ الا المايدى، - دەيدى تاناشەۆا.
وسىعان بايلانىستى ول “باقىتتى وتباسى” جانە “شاڭىراق” باعدارلامالارى بويىنشا باستاپقى جارنانى مىندەتتى شارتتاردان الىپ تاستاۋدى نەمەسە ءۇش ساناتقا – كوپبالالى وتباسىلارعا، تولىق ەمەس وتباسىلارعا جانە مۇگەدەكتىگى بار بالالاردى تاربيەلەپ وتىرعان وتباسىلارعا تۇرعىن ءۇي سەرتيفيكاتىن بەرۋدى ۇسىندى.
سونداي-اق ەرەكشە قاجەتتىلىگى بار بالالاردى تاربيەلەپ وتىرعان وتباسىلاردى جانە مۇمكىندىگى شەكتەۋلى ەرەسەكتەردى تۇرعىن ۇيمەن قامتاماسىز ەتۋ ءۇشىن جەكە كەزەك جاساۋ، “باقىتتى وتباسى” باعدارلاماسىنا تولىق ەمەس وتباسىلاردى قوسۋ ۇسىنىلدى.
